ஏலியன் கோவ்னன்ட் அல்லது மரண கிரஹம்

நடிகை கத்தரீன் வாட்டர்சன் (கேப்டன் டேனியல்ஸ் ஆக ஏலியன் கோவ்னன்ட் திரைப்படத்தில் நடித்தவர்) அவரின் வெளிவராத டைரிகுறிப்பு

சிகுர்னே வீவரை ஏலியன் ஆத்தான்னு கூப்டும்போதே ஏலியன் இனம் அழிஞ்சு போச்சுங்கிற நம்பிக்கையில, ஸ்காட்டு பிரோதியுமியூஸ்-ங்கற மொக்க விண்வெளி கப்பலை பறக்க விட்டார்.

அது கவுந்தும், புத்தி வராமல் எம்புருஷனோட தலைமையிலே அள்ளக்கை கும்பல கோவனன்ட்-ங்கற விண்வெளி கலத்தில ஏத்தி திரும்ப அனுப்பறாங்க. டேவிட்-னு அங்கே ஒரு டெரர் ரோபோ, அதையே வால்டர்-னு பேர மாத்தி அதே மாதிரி குடாக்கு ரோபோவோட அனுப்பறாங்க.

பாதி வழியிலேயே என்னோட வூட்டுகாரரு கள்ளநோட்டு கண்டுபிடிக்கிற மிஷினுல வைச்ச நோட்டு போல எரிஞ்சு போயிடுறாரு.

 அடுத்து பதவி ஏத்துகிற கேப்டனுக்கு கிரகம் சரியில்ல. இன்னொரு கிரகத்திலிருந்து பாட்டு கேக்குதுன்னு, அதை பாக்க முடிவு செய்யுறாரு. மொக்க படத்தில அதைவிட மொக்க முடிவுன்னு நான் சொல்லியும் கேக்கல. அங்க போனா, கிரகத்து மேல புயல் அடிச்சுகிட்டு இருக்கு. இதைவிட நல்ல சகுனம் வேணுமா, கேட்டானுங்களா.

அங்கே போய் இறங்கி, மேலே சொன்ன அத்தனை மொக்க முடிவுகளையும் தூக்கி சாப்றாப்போல பல ஜிகிடி முடிவுகளை நம்ப கம்பெனி எடுக்குது. படம் முடியறச்ச நான் கோவென அழுவேன். இதுல போய் மாட்டுனேன்னேன்னு இல்லை. காட்சிக்கு தேவைப்பட்டதால் அழ வேண்டியதாயிற்று.

மீதியை வெண்திரையில் காண்க.

இத வெண் திரையில பாக்கணும்னு முடிவு பண்ணீங்க பாத்தீங்களா, அதுதான் மேல சொன்ன எல்லாத்தையும் விட பெரிய மொக்க முடிவு.

ஆனா, ஸ்காட்டு ஏலியன் கிளிமஞ்சாரோ-ன்னு ஒரு கப்பலை அனுப்பிச்சா பாக்காமயா இருக்க போறீங்க?

 

பாகுபலி 2 – தி கான்குளுஷன்

பெரும் மதிப்பிற்குரிய மன்னர் பல்லாலதேவர் அய்யா அவர்களுக்கு,

அய்யா, உங்களை ஏமாற்றி விட்டார்கள். உங்கள் திரு உருவ சிலை தங்கத்தில் செய்வதாக சொல்லி, தெர்மாக்கோலில் செய்து கொடுத்து விட்டார்கள். ஏதோ சொல்ல வேண்டுமென்று தோன்றியது. சொல்லி விட்டேன்.

மதுரை பக்கம் ஆளுங்களா அவங்கள்?

ராஜ விசுவாசி

 

ஒலிம்பிக்

           ஒரு பதக்கம் கிடைத்து விட்டது. ஒலிம்பிக்கிற்கு சென்ற நமது விளையாட்டு வீரர்களை குறை சொல்லி நிறைய விமர்சனங்கள் இணையத்தில் இருக்கின்றன. அவர்கள் களங்களை அமைக்கும் அரசு தரப்பு சார்பாக (உதாரணமாக, சாய் பள்ளிகள்) விமர்சனங்கள் பெரிதாக எழவில்லை. சாய் பள்ளி மாணவர்களுடன் நான் விளையாடி, பழகியிருக்கிறேன். துடிப்பானவர்கள். ஒரே குறை பயிற்சியாளர்கள்.

       விளையாட்டு வீர்கள் எழுந்து வர வேண்டுமென்று தேட வேண்டியதில்லை. அவர்கள் இருக்கிறார்கள். அவர்களை பயிற்றுவிக்கதான் ஆட்கள் இல்லை. வல்லரசு ஆக வேண்டுமென்ற கனவு இருக்கின்ற நாடு, உலக அளவில் விளையாட்டு போட்டிகளில் வெல்ல தடுமாறிக் கொண்டிருந்தால் எப்படி? சீனப் பொருட்கள் தரத்திலும் விலையிலும் மலிவானவை என நம்புகிறோம். ஒலிம்பிக்கில் அவர்களது பதக்கப்பட்டியல் அதை மறுக்கிறது.. இராணுவ ஆட்சி, மக்களாட்சி என்றெல்லாம் ஜல்லியடிக்க வேண்டியதில்லை.

        தற்சமயம் சென்ற வீரர்களை குறை சொல்லி பயனில்லை. உண்மையில், வீரர்களை குறை சொல்லவே கூடாதென்றே நினைக்கிறேன். அவர்களை தேர்வு செய்யும், பயிற்றுவிக்கும் ஒரு மாபெரும் அசமந்தமான அரசு இயந்திரம் ஒன்று உள்ளது. அதை மாற்றினாலே போதும். அதுவும் ஏறக்குறைய அனைவருக்கும் தெரியும்.

        ஒவ்வொரு நாளும், பதக்கப்பட்டியலுள் வந்து விட்டோமா என பார்க்கும் என் கோபத்தை எவ்வாறுதான் காட்டுவது? விளையாட்டை விளையாட்டாக எடுத்துக் கொள்ள வேண்டுமென்ற எண்ணம், இதை படிக்கும் யாருக்கெனும் வந்தால், அவர்கள் வாழ்க்கையில் விளையாட்டை வேடிக்கை பார்த்தவர்களாகதான் இருப்பார்கள்.

ஐயா, மூடிக் கொண்டு போங்கள்.

     கிரிக்கெட் ஒருவேளை ஒலிம்பிக் விளையாட்டுகளில் சேர்க்கப்பட்டால், அப்போது தெரியும் நமது தகுதி.