Archive for November, 2008

வேதாள நகரம் – 06. சின்ன அணில்

      கங்குவா இன செவ்விந்திய தலைவனின் குடில்.  நமது இலட்சிய குதிரை வீரர்களை சுற்றி இருநுாறு பேர் கூடியிருந்தனர்.  அவர்களின் தலைவன் மிகவும் குள்ளமானவனாக இருந்தான்.

‘எங்க எல்லைக்குள் அனுமதியில்லாம நுழைந்ததற்கு மரண தண்டனை தான் என்பது தெரியுமா?

    அவனின் ஆணவ பேச்சு சுத்த வீரனான விஷ்வாவின் இரத்தத்தை சூடேற்றியது.   அவனுக்கு சூடாக பதில் அளிக்க விரும்பினார். அந்த தலைவன் தான் சொன்னதை நிருபிக்க தன் கோவணத்தில் இருந்து மிகப் பெரிய கத்தியை எடுத்து சுற்றியும் காட்டினான்.  அந்த கத்தியை அலட்சியமாக பார்த்த சுத்த வீரன் விஷ்வா,  தன் எண்ணங்களை மிகத் தெளிவாக, எவ்வித அச்சமின்றி வெளியிட்டார்.

‘சாமியோவ், இது உங்க எல்லைங்கிறது எங்களுக்கு சத்தியமா தெரியாதுங்க.  தெரிஞ்சா வந்தே இருக்க மாட்டோங்க.  எங்களை மன்னிசிடுங்க.  இனிமே இந்த ஏரியா பக்கமே வர மாட்டோங்க.’

‘அது முடியாது.  எங்கள் குல வழக்கப்படி ஒன்று உங்க எல்லோருக்கும் மரண தண்டனை அல்லது எங்கள் குல சாம்பியனோட உங்களில் யாராவது முன்வந்து சண்டையிட்டு வெற்றிக் கொள்ள வேண்டும்.’

    விஷ்வா வேகமாக சிந்தித்தார்.  இவனுங்களா பார்த்தா காட்டுமிராண்டி பசங்க மாதிரி இருக்கு.  சண்டைன்னா பேயடி அடிப்பான்ங்க.  இது வேலைக்காவது.  இன்னும் கொஞ்சம் கெஞ்சி அழுது விடுதலை வாங்கிட்டு ஒடியே போய்ட்லாம் என முடிவு செய்தார். அதற்குள் அந்த செவ்விந்திய தலைவன் விஷ்வாவைப் பார்த்து புன்னகை செய்தான்.

‘நீ ஒரு சுத்த வீரன்தான்.  உன் நண்பர்களுக்காக சவாலை ஏற்றுக் கொண்டாயே?

         வெதுக்கென்றது நமது கதாநாயகனுக்கு.  திரும்பி பார்த்தால் அவர் உயிர் நண்பர்கள் இருவரும் மூன்றடி தள்ளி நின்றுக் கொண்டிருந்தார்கள்.  அடப்பாவிகளா!

‘வீரனே, ஒரு அரை மணி நேரம் ஓய்வெடு.  எங்கள் குல சாம்பியன் சின்ன அணிலோடு நீ மோதப் போகிறாய்.’

       விஷ்வா வெகு வேகமாக தன் நண்பர்களிடம் வந்து, ‘என் கூட தானே நின்னிங்க.  அப்புறம் ஏன்யா மூன்றடி பின்னாடி போனிங்க.  நான் மாட்டிக்கிட்டேன் பாத்திங்களா?

     கலீல், ‘விஷ்வா,  யாரோ கூப்பிட்ட மாதிரி இருந்துச்சின்னு திரும்புனேன்பா’

     சதீஷ், ‘கால்ல அரிச்ச மாதிரி இருந்துச்சி. அப்டியே திரும்புனேன்’

   ‘அதை விடு.  சின்ன அணில் தானே.  வாலைப் புடுச்சி ஒரு சுத்து சுத்தி போட்டுட்டு வா, விஷ்வா.  நாம கிளம்பி போய்கிட்டே இருக்கலாம்.’

‘சின்ன அணில்ன்னு சொல்றான்ங்க.  அவன் ஏதாவது படாத இடத்தில கடிச்சு வைச்சானா என்ன பண்றது’

     ஒரு  வயதான செவ்விந்திய வீரன் அவர்களை நோக்கி வந்தான்.

‘வீரனே, இந்த ஒற்றைக்கு ஒற்றை மோதல் எங்கள் குல வழக்கம்படி நடக்கும்.  போட்டியிடும் இரு வீரர்களும் எங்களின் புனித துணியின் இரு முனைகளை அவரவர் வாயில் வைத்து கடித்துக் கொண்டே சண்டையிட வேண்டும்.  எவர் துணியை விடுகிறார்களோ அல்லது முதலில் எமனுலகம் போய் சேர்க்கிறார்களோ அவர் தோற்றவர் ஆவார்’ என ஒற்றைக்கு ஒற்றை மோதலின் முதல் விதியை விளக்கினார்.

      ‘வாயில துணியக் கட்டிக்கிட்டு சண்டையா.  இத மாதிரி ஏற்கெனவே செய்திருக்கேன்.  ஆனா அது ஒரு பொண்ணுக்கூட. நல்ல வேளை, சின்ன அணில் நம்மளை படாத இடத்துல கடிச்சு வைக்க மாட்டான்.’

———————————————————————-

     நமது இலட்சிய வீரர்கள் தப்பியதை அறிந்த ஜானி பீரோ கொதித்தான்.  அவர்களுக்கு ஏதோ ஒரு புதையலின் வரைபடம் கிடைத்திருக்க வேண்டும். அதனாலேயே சிறைச் சாலையிலிருந்து தப்பித்திருக்கிறார்கள் என முடிவு பண்ணி தன் அப்ரண்டீஸ் செழியுடன் அவர்களை தேடி புறப்பட்டான்.

————————————————————————

       அந்த செவ்விந்திய குடியிருப்பிலிருந்து பதினைந்து கிலோ மீட்டர் தொலைவில் மர்ம குதிரை வீரர்கள் காத்திருந்தனர்.

—————————————————————————–

     அந்த செவ்விந்திய குடியிருப்பிலிருந்து ஐம்பது கிலோ மீட்டர் தொலைவிலிருக்கும் நோவடி நகரை நோக்கி ஒரு கோச் வண்டி வந்து கொண்டிருந்தது.

———————————————————————————

       ஒரு கடற்கரை.  அங்கே இக்கதையின் ஆசிரியன் கதை நாலாபக்கமும் அலைவதால் கதையை எங்கே விட்டோமென்று குழம்பிக் கொண்டு நிற்கிறார்.

—————————————————————————-

      செவ்விந்திய குடியிருப்பு.  ஒற்றைக்கு ஒற்றை போட்டி திடல்.

     ‘விஷ்வா, சட்டுபுட்டுன்னு சண்டைய முடிச்சுட்டு வா. ’

    ‘ஏம்பா, இவர பாத்தா சண்டய விரும்புற மாதிரி தெரியலையே’

   ‘என்ன பெருசு, இப்படி சொல்லிட்ட, அண்ணன் தானா சண்டக்கு போக மாட்டாரு.  சண்டன்னு வந்திச்சி, பறந்து பறந்து அடிக்கிறதுல பல்லி, முள்ளு முள்ளா குத்துறதுல கள்ளி, மொத்தத்துல சண்டன்னு வந்தா பெரும் புள்ளி.’

‘டாய், எவன்டா இங்க சின்ன அணில்? சீக்கிரம் அவனை கூட்டிட்டு வாங்கடா. பல ஜோலிக் காரங்கடா நாங்க. சட்டுபுட்டுன்னு முடிச்சுட்டு அடுத்த சவாலை நோக்கி போக வேண்டாம்?  அண்ணே, நீங்க போங்கண்ணே, ஜெயிச்சிட்டு வாங்கண்ணே.’

‘டேய் சின்ன அணில் பயலே, எங்க அண்ணங்கூட மோதப் போறே, வூட்டுல சொல்லிட்டு வந்துறு.  எங்க அண்ணன் உடம்பு இரும்பு, அவரு மனசு கரும்பு, உயிரோட இருக்கணும்னா போட்டிய விட்டு நீ கிளம்பு’

‘யோவ், நிறுத்துங்கய்யா, எனக்கென்னமோ ஒரே திகிலா இருக்கு.’

‘(மெல்லிய குரலில்) விஷ்வா, இப்படியெல்லாம் பிட்டு போட்டுதான் எதிராளிய பயமுறுத்துணும், நீ சும்மா இரு…. (உரத்த குரலில்) டாய், எங்க அண்ணனை பாத்தா திகிலுக்கே திகில் வருண்டா …’

     மேற்கொண்டு சதீஷ் பேசும்முன் அங்கிருந்த கூடாரத்தை விலக்கிக் கொண்டு சின்ன அணில் வெளியே வந்தான்.  ஆறரை அடி உயரத்துடன் இருந்தான்.  பொதுவாக கட்டுடல் கொண்டவர்களுக்கு சிக்ஸ் பேக்ஸ் இருக்கும், இவனுக்கோ சிக்ஸ்டீன் பேக் இருந்தது.  அவன் மார்பிலே வெற்றி பெற்ற படத்தின் நுாறாவது நாள் போஸ்டரை ஒட்டலாம். அவனுடைய கைகள் ஒவ்வொன்றும் இரண்டு உலக்கைகள் போல இருந்தன.  அவனுடைய கால்கள் போர்க்கப்பல்களில் உபயோகப்படுத்தும் நங்கூரங்கள் போல இருந்தன. ஒரு கோவணம் மட்டுமே அணிந்திருந்தான்.  நமது இலட்சிய வீரர்களை பார்த்ததும் ஒரு உறுமல் அவனிடமிருந்து எழுந்தது.

     ‘சதீஷ், பூமி நடுங்கிக் கொண்டிருக்கிறது போல இருக்கிறதே.  பூகம்பம் வருவது போல இல்லை’

    ‘அப்டியெல்லாம் இல்லை, விஷ்வா.  உன் கால்கள் இரண்டும் ராக் அண்ட் ரோல் ஆடிக்கொண்டிருக்கின்றன.’

                                                                                                               தொடரும்

Advertisements

November 29, 2008 at 8:49 am 11 comments

வேதாள நகரம் 5. சிறைச்சாலை

     பெருசு, இதான் அந்த வரைப்படமா?

     ஆமாம்பா, மனசுலேந்து ஒரு பெரிய பாரம் இறங்கினா மாதிரி இருக்கு.  நான் இன்னும் கொஞ்ச நாள்தான் உயிரோட இருப்பேன்.  எனக்கு நீங்கதான் இறுதிசடங்கு செய்யணும்.

‘அது சரியா வராது பெருசு.  நாளைக்கு காலையில டிபன் பண்ணிட்டு நாங்க கிளம்பறோம்.  அதுக்குள்ள நீ டிக்கெட் வாங்கிட்டா உனக்கு எல்லா சடங்கும் செய்வோம். ’

‘விஷ்வா, ஏம்பா இப்படி பேசுற. ஒன்னு செய்வோம்.  பெருசயும் நம்ப கூட கூட்டிட்டு போவோம். பெருசு, எங்க டிக்கெட் வாங்குதோ அங்கேயே இறுதி சடங்கு செஞ்சிறலாம்.’

‘சரிப்பா, அப்படியே செய்வோம்.’

டொக் டொக்

‘எவன்டா இந்த நேரத்துல கதவ தட்டுறது.  கலீல் போய் பாரு’

‘யார ஒருத்தன் லுசு மாதிரி இருக்கான்பா. யாருய்யா நீ?’

‘நான் இந்த ஊரு டெபுடி, உங்கள அரஸ்ட் செய்ய வந்துருக்கேன்’

பின்னால் விஷம புன்னகையுடன் ஜானி பீரோ.

—————————————————————————-

       டூமில்குப்பத்திலிருந்து 20 கிலோ மீட்டர் தொலைவில்   கங்குவா இனத்தை சேர்ந்த ஒரு செவ்விந்தியன் ஒரு குதிரை வீரன் கொடுத்த பணப்பையை வாங்கி தன் குதிரையில் வைத்துக் கொண்டு எதுவும் பேசாமல் கிளம்புகிறான்.

————————————————————————-

ஷெரீப் அலுவலகம். டூமில்குப்பம்.

   ‘யோவ் நாங்க என்ன தப்பு செய்தோம்?

   ‘சூப் வாங்க வந்த ஒரு பாட்டியை நீங்க மூன்று பேரும் கையப்பிடித்து இழுத்துருகீங்க’

   ‘நீங்க என்ன சொல்றீங்கன்னே புரியலை.  லாஜிக்கா பாத்தாலும் பாட்டிக்கு ரெண்டு கை தான் இருக்கும்.  எப்படி மூணு பேரு புடிச்சு இழுக்க முடியும்?

‘அதெல்லாம் காலையில்ல கோர்ட்டுல சொல்லுங்க. இப்ப ஜெயில்ல போய் படுங்க’

‘நாங்க இந்த ஊரு ஜட்ஜ உடனே பாக்கணும்’

‘அடப்பாவிகளா, நீங்க கைய பிடிச்சு இழுத்த பாட்டிதான்யா ஜட்ஜ்’

அப்போது அட்டகாசமாக சிரிப்புடன் ஜானி பீரோ அவன் உதவியாளர் செழியுடன் வருகிறான்.

‘அந்த கிழவன் உங்ககிட்ட எதையோ கொடுத்தான், அது என்னா?

‘மரியாதையா கேட்டா சொல்ல மாட்டீங்க.  தெரியற வரைக்கும் இந்த ஊரவிட்டு நீங்க நகர முடியாது’

      செழி உடன் ஒரு மரியாதையான பார்வையுடன் விஷ்வாவை பார்த்து, ‘நீங்க இந்த ஊருக்குள்ளே நுழையும்போது வாசலில் ஒரு உலகத் தரமான ஹைக்கூ எழுதினிங்களே, அப்புறம் ஏன் இந்த காட்டு பசங்களோட அலையிறிங்க. என்ன ஒரு கவிதை அது.  நிலா, சப்பாத்தி, துப்பாக்கி. அட அடா, நிலா பௌர்ணமி முடிஞ்சு தேய தொடங்கிடும். ஆனா அமாவசைக்கு அப்புறம் வளர தொடங்கிடும். சப்பாத்தி பிச்சு பிச்சு தின்னா காண போயிடும். ஆனா புதுசா சுட்டா முழுசாயிடும். துப்பாக்கி சுட சுட குண்டு தீந்து போயிடும். அப்பால புதுசா ரொப்பிக்கலாம். அதே போல தான் வாழ்க்கைன்னு எவ்ளோ எளிமையா சொல்லிட்டிங்க’ என வியந்து போகிறார்.

      அந்த இடத்தில் ஒரு மயான அமைதி நிலவியது.

   ஒவ்வொருவராக  விஷ்வாவை ஒரு பயந்த பார்வை பார்த்துக் கொண்டே கிளம்ப ஆரம்பிக்கிறார்கள். டெபுடி அவர்களை நோக்கி, ‘சரி, உங்கள் ஆயுதங்களை எல்லாம் என்னிடம் கொடுங்கள்’

     குதிரை வீரர்கள் தங்கள் ஆயுதங்களை கழற்றி கொடுக்கிறார்கள். கலீல் தன் சாட்டையை டெபுடியிடம் கொடுக்கிறார்.

‘வேண்டாங்க, இதை நீங்களே வைச்சுகோங்க’

‘இல்லீங்க, இது ஒரு ஆயுதங்க.’

‘பரவாயில்லையிங்க.’

‘அட, சொன்னா கேளுங்க, இது ஒரு ஆபத்தான ஆயுதங்க.’

‘அட வேணாம்னு சொன்ன கேளுங்க எடுத்துட்டு போங்க’

கடுப்புடன் கலீல் தன் சாட்டையுடன் சிறைக்கு செல்கிறார். அவர்களை அடைத்து சிறையை பூட்டிவிட்டு டெபுடியும் கிளம்புகிறார்.

‘இதுல ஏதோ ஒரு மர்மம் இருக்கு.  நம்ப மேல ஒரு வீண் பழி சுமத்தி ஏன் நம்மை இங்கே அடச்சு வைக்க பாக்கறாங்க.  ஏம்பா, கைய புடிச்சு இழுத்திட்டிங்களா?

‘யோவ், நீயே இப்டி கேட்டா எப்டி? எனக்கு உம்மேல தான் சந்தேகமா இருக்கு?

‘எம்மேலயா?

‘ கவித எழுதற நீ கைய பிடிச்சு இழுக்க மாட்டியா?

‘விஷ்வா, சதீஷ், சண்ட போடுறத நிறுத்துங்க. நாம இங்கேயிருந்து தப்பிக்கணும்.  எம்மேல சுமத்தப்பட்ட பழிய மத்தவங்க கேட்டா எவ்வளவு அவமானமாக இருக்கும்? என்னோட இமேஜ் என்ன ஆகும்? பாட்டியை போய்……………… என்ன கொடும சார் இது?

      சிறையை சுற்றி பார்க்கின்றனர்.  தீடிரென்று விஷ்வாவுக்கு ஒரு எண்ணம் உதயமாகிறது. 

    ‘சதீஷ், உன்னோட மருந்து பெட்டிய எடு’

   விஷ்வா  சதீஷின் மருந்து பெட்டியை திறந்து அதில் காணப்படும் சிரப்புகளில் சிகப்பாக இருப்பதை எடுத்து சிறைக்கம்பிகளில் ஊற்றுகிறார்.  சில நொடிகளுக்கு பிறகு ஸ்ஸ் என்ற சத்தத்துடன் சிறைச்சாலை கம்பிகள் உருக தொடங்குகின்றன.

     ‘அட்டகாசம் பண்ணிட்ட, விஷ்வா.    ஆமா, சதீஷ், என்ன சிரப்யா இது?

    ‘இருமல் சிரப்.’

    மயான அமைதி.

    ‘யோவ், பொட்டிய உடனே மூடி சாவிய எங்கிட்ட கொடு’

  சிறையிலிருந்து தப்பி மூன்று இலட்சிய குதிரை வீரர்களும், எஸ்கோபரும் நகரை விட்டு வெளியேறுகின்றனர்.  டூமில் குப்பத்திலிருந்து நாற்பது கிலோ மீட்டர் தொலைவு சென்றதும்,  இரவு அங்கு தங்கி மறுநாள் கிளம்ப முடிவு செய்கின்றனர்.

     மறுநாள் காலை.  நம் கதாநாயகர்கள் கண்களை திறந்து பார்த்தபொழுது, அவர்களைச் சுற்றி கண்களில் கொலைவெறியுடன் கங்குவா இன செவ்விந்திய வீரர்கள் இருபது பேர்.

                                                                                                    தொடரும் …………..

November 28, 2008 at 5:33 pm 2 comments

27-11-2008

       மும்பை தொடர் குண்டு வெடிப்பு காரணமாக தேசிய பங்கு சந்தை மற்றும் மும்பை பங்கு சந்தைக்கு இன்று விடுமுறை அளிக்கப்படுகிறது.

       இதில் சம்பந்தப்பட்ட தீவிரவாதிகளை இரும்புகரம் கொண்டு ஒடுக்க வேண்டும் என்பதில் இருவேறு கருத்துக்கு இடமில்லை என்ற போதிலும், வரலாற்றை புரட்டி பார்த்தோமென்றால் நமது அரசாங்கம் தீவிரவாதிகளிடம் ஒரு மென்மையான அணுகுமுறையையே மேற்கொண்டுள்ளது.  இதில் முஸ்லீம் தீவிரவாதிகள் என்ற பட்டம் வேறு அவர்களுக்கு கொடுக்கப்படும்.  தீவிரவாதிகளை முஸ்லீம் தீவிரவாதிகள், ஹிந்து தீவிரவாதிகள்  என பிரித்து அழைப்பது அபத்தம்.  அவர்கள் தீவிரவாதிகள்.  அவ்வளவுதான். 

      மக்கள் ஒட்டு என்ற கணக்கை வைத்து செயல்படாமல் உண்மையிலேயே மிகக் கடுமையான நடவடிக்கை எடுக்க வேண்டும் என நம் அரசியல்வாதிகளிடம் எதிர்பார்ப்போம்.

     பலத்த காற்று இங்கே வீசிக் கொண்டிருக்கிறது.  மழையும் விட்டபாடில்லை.  

      வேறு ஏதாவது பங்கு  பரிந்துரை நிப்டியானந்தர் பக்கத்தில் கொடுக்கமுடியுமா என இன்று முயற்சி செய்கிறேன்.     

      Good Morning to you all!

November 27, 2008 at 6:53 am 4 comments

பெய்யென பெய்யும் மழை

     ஆறு மாதங்களுக்கு முன் ஒரு உணவகத்தில் ஒரு ஆங்கிலேயரை சந்திக்க நேர்ந்தது.  மொழிப் பிரச்சினை காரணமாக எழுவிருந்த ஒரு சங்கடமான தருணத்தை தவிர்க்க அவருக்கு உதவி செய்ய நேர்ந்தது.  பேசிக் கொண்டிருக்கையில், அவர் இங்கிலாந்தில் என்ஜீனியர் என்றும், ஆப்பிரிக்க நாடுகளில் பணிபுரிந்து ஓய்வு பெற்ற பிறகு இந்தியா, இலங்கை போன்ற நாடுகளுக்கு சுற்றுலா வந்திருப்பதாக சொன்னார்.

       கால்பந்தில் ஈடுபாடு எனக்கு உண்டு என்பதால், இருவருக்குமே பேச நிறைய விஷயம் கிடைத்து விட்டதால், நிறைய பேசிக் கொண்டிருந்தோம்.  ஒரு கட்டத்தில் இங்கிலாந்தை போல் என் நாட்டிலும் மழை தவறாமல் பெய்தால், எங்கேயே போயிருப்போம் என குறிப்பிட்டேன்.

       சிறிது நேரம் மௌனமாக இருந்து விட்டு அவர் மெல்ல பேசத் தொடங்கினார் ‘உங்கள் நாட்டில் குறிப்பிட்ட சில நகரங்கள் தவிர வேறு எந்த நகரமுமே கன மழையை உத்தேசித்து கட்டமைக்கப் படவில்லை.  ஒரு நகரம் என்றும் புதிதாக இருக்க சாக்கடைகள் (Drainage) முக்கியம்.  நீங்கள் அதற்கு முக்கியத்துவம் கொடுப்பதாக தெரியவில்லை.  அதை மிகுந்த அறுவெறுப்புடன் எதிர்கொள்கிறீர்கள் என்பது பார்க்கும்போது தெரிகிறது.    மழையை நீங்கள் எதிர்கொள்ளும் விதமும் சரியில்லை என உணர்கிறேன்.’

      அதுபற்றி அப்போது நான் பெரிதாக எதுவும் எடுத்துக் கொள்ளவில்லை.  பிறகு டேவிட் பெக்காமை பற்றி நான் சொன்ன கமெண்டிற்கு அவர் மிகவும் உற்சாகமாக பதில் சொல்ல தொடங்கிவிட்டார்.

       தற்போது ஐந்து நாட்களாக பெய்து வரும் மழையை பார்க்கும்போது இதைப் பற்றி தெளிவான பார்வை எதுவுமே நம்மிடம் இல்லை என்றே தோன்றுகிறது.  செய்தித்தாட்களில் மழை பற்றி அக்டோபர், நவம்பர் மாதம் வரும் செய்திகள் எல்லாமே கீழ்கண்டவாறே இருக்கும்.

     புயல் சின்னம் தோன்றி, மழை ஆரம்பிக்கும் 12 மணிநேரத்திற்கு முன் –  வங்கக் கடலில் புயல் சின்னம், தமிழ்நாட்டின் கடலோர மாவட்டங்களில் பலத்த மழை பெய்ய வாய்ப்பு.

     பலத்த மழை பெய்யும்போது – புயல் தற்போது 100 கிலோமீட்டர் தொலைவில் உள்ளது கரையை கடக்கும் வரை பலத்த மழை பெய்யும்.  

      2.  ஆறுகள், ஏரிகள், குளங்கள் நிரம்புகின்றன. சென்னை புழலேரியில் நீர்மட்டம் அதிகரித்து வருகிறது

    3.  ஆற்றோரங்களில் வெள்ளம் வர வாய்ப்பு.  மக்கள் பாதுகாப்பான பகுதிகளுக்கு செல்ல கலெக்டர் அறிவுறுத்தல்.

    4. மிதக்கிறது சென்னை. 

    5. பலத்த மழைக்கு  6 பேர் பலி.

  மழை முடிந்த பின் –  மழை சேதங்களை அமைச்சர் பார்வையிட்டார்.  வெள்ள நிவாரண நிதியாக 100 கோடி மத்திய அரசிடம் கோரியுள்ளார்.

      யோசித்து பாருங்கள்,  வருட வாரியாக இது போன்ற செய்திகளையே நாம் தினசரிகளில் பார்த்து வருகிறோம்.  தென் இந்தியாவில் ஒரு வருடத்தில் கிட்டத்தட்ட 340 நாட்கள் நாம்  பகல் பொழுதில் வெயிலை சந்தித்து வருகிறோம்.  மீதியுள்ள 25 நாட்களிலும் கன மழை ஏதேனும் ஒரு 5 நாட்கள் மட்டுமே பெய்யும். அப்படியும் கணக்கில் கொண்டால் தொடர் மழை ஐந்து நாட்களுக்கு மேல் நீடித்து நாம் பார்த்ததில்லை.   ஒருவேளை அதற்கு மேல் நீடித்தால் என்ன செய்வது? 

     தமிழ்நாட்டில் வாழும் நாம் உள்ளூர மழையை சந்திக்க தயாராக வில்லை என்றே தோன்றுகிறது.  நகரங்களும் பலத்த மழையை தாங்கும் வண்ணம் கட்டமைக்கப்படவில்லை.  எது நேர்ந்தாலும் வருடத்தில் ஒரு ஐந்து நாட்கள்தான்.  அதற்கு போய் ஏன் இவ்வளவு கவலை என அரசாங்கமும் மறந்துவிடுகிறது.  

    ஒவ்வொரு மாவட்ட ஆட்சியர் அலுவலகத்திலும் வெள்ள சமயத்தில் செய்ய வேண்டிய பணிகள் குறித்து கையேடுகள் உண்டு.  யார் யாருக்கு என்னென்ன பணிகள் என பிரித்துக் கொடுக்கப்பட்டிருக்கும்.  வெள்ள வடிகால்கள் என ஒவ்வொரு முக்கிய ஆறுகளுக்கும் உண்டு.  அவை சரியாக பராமரிக்கப்படாமல் சீரடைந்து கிடக்கின்றன.  ஒரு சாதாரண மழை நீர் கூட சரியாக வடிகால் இல்லாமல் தேங்கி அதனால் பலவித உபாதைகள் எழுகின்றன.

     அதனை சரிசெய்ய நிதி ஒதுக்கீடுகள் செய்யப்படுவதில்லை.  அப்புறம், சாலைகள்.  தேசிய நெடுஞ்சாலையை தவிர வேறு எந்த உள்ளூர் சாலைகளும் மழையில் அடித்துச் செல்லப்படுவதை எத்தனை தடவை தொலைக்காட்சியில் பார்த்திருக்கிறோம்.  வெள்ள நிவாரண பணிகள் செவ்வனே நடைபெற சீரான போக்குவரத்து முக்கியம்.  சாலைகளே அடித்துச் செல்லப்படும் போது, என்ன வெண்டைக்காய் நிவாரணப் பணிகள்.  சாலைகள் வெள்ளத்தில் அடித்துச் செல்லப்படுவதை நமது தினசரிகள் அது சாலைகளின் தவறே ஒழிய, அரசின் தவறில்லை என்ற வகையில் செய்திகள் வெளியிடும். 

      ஆற்றின் அருகே வீடுகள் கட்ட இஷ்டப்படி நகராட்சிகள் அனுமதி கொடுத்திருக்கிறார்கள்.  வருடத்தில் பெரும்பாலான நாளில் ஆற்றில் தண்ணீர் வருவதில்லை.  வரவும் வராது என்ற ‘நீண்ட கால’ திட்ட அடிப்படையிலேயே அனுமதி வழங்கப்பட்டுள்ளது.  மழைக்காலத்தில் முதலில் பாதிக்கப்படுவது அங்கு வசிக்கும் மக்கள்தான்.  பிறகு வழக்கம்போல் நிவாரணம் கொடுத்து அந்த வருட ஆட்டம் முடிந்து அடுத்து வரவிருக்கும் வருடத்திற்கான ஆட்டம் நீண்ட இடைவெளியில் உள்ளது என வேறு வேலைக்கு போய்விடுவார்கள்.

            ஒரு பிரச்சினைக்கு  தீர்வு என்னவென்று தெரியாமல் எழுதினால் நாமும் அந்த பிரச்சினையின் ஒரு அங்கமாகி விடுவோம் (சிவ் கெரா எளிமையாக சொன்னதை மிக கடினமாக மொழி பெயர்த்திருக்கிறேன்).  சொல்லப்படாத தீர்வுகள் எதுவுமே இல்லை என்பது தான் உண்மை.  இயற்கை பேரிடரை தடுப்பதற்கு திட்டங்கள் இருக்கின்றன.  அது தொடர்பான கையேடுகள் மாவட்ட ஆட்சியர் அலுவலகத்தில் எப்போதுமே இருக்கும்.  செயல்முறை படுத்துவதில் ஏற்படும் நடைமுறை இடைஞ்சல்களை மட்டும் நீக்கினால் போதும்.

      தற்போது ஐந்து நாட்களாக பெய்து வரும் மழைக்கு தமிழகமே மிதக்கிறது என செய்தி வந்தவண்ணம் உள்ளன.  உண்மை நிலவரமும் அதுதான்.  ஒருவேளை இந்த மழை தொடர்ந்து இன்னும் ஐந்து நாட்கள் பெய்தால் என்னவாகும்?  அது எப்போதுமே ஆட்சியாளர்களின் தவறில்லை, மழையின் தவறுதானே!

November 26, 2008 at 5:37 pm 6 comments

26-11-2008

     அமெரிக்க சந்தை Thanksgiving Day 27-ஆம் நாளில் கொண்டாடுகிறது.   அவர்களுக்கு முக்கிமான பண்டிகை அது.  நாமும் கொண்டாட வேண்டும்.  ஏனெனில் இரண்டு நாளுக்கு அவர்களின் சந்தையை மூடி விடுவார்கள். 

      தற்போது ஆசிய சந்தைகள் ஒரளவு ஏற்றத்தில் இருக்கின்றன. குறிப்பாக சீனச் சந்தை, இதை எழுதும்போது.  சீன சந்தை ஏற்றத்தில் இருப்பது நம் சந்தைக்கு ஒரு நல்ல செய்தி.

      நாளையுடன் ப்யூச்சர்ஸ் முடியும் நாள் என்பதால், இந்த இரு தினங்களுக்கு சந்தை பல்வேறு விதமான ஏற்றத் தாழ்வுகளுடன் இருக்கும் என்பது நாம் அறிந்ததே. 

     இன்றைய சந்தை எப்படி வேண்டுமானாலும் முடியலாம் என்றாலும், 50 புள்ளிகளுக்கு மேல் ஏற்றத்துடன் முடிய வாய்ப்பு உண்டு என்று நான் நினைக்கிறேன். 

     ஐந்து நாட்களாக தொடர் மழை. இந்த மழையை தாங்க முடியாமல் தமிழகமே தள்ளாடிக் கொண்டிருக்கிறது என்றால் அடிப்படையாக ஏதோ நம்மிடம் தவறு இருக்கிறது என நினைக்கிறேன்.   இதைப் பற்றி விரிவாக எழுதலாம் என நினைக்கிறேன்.

Good Morning to You All!

Post Market:

     ‘கண்ணா, மாருதி காருக்கெல்லாம் நாம ஆசைப்படக்கூடாதுடா, நாம ஏழைங்க’ என்ற டயலாக் இப்போது அமெரிக்க பெற்றோர் நிறைய சொல்வதாக கேள்விப்படுகிறேன்.  அமெரிக்க பொருளாதாரமே அவர்களின் வரவுக்கு மேலான செலவை மையமாக வைத்து எழுப்பப்பட்டுள்ளது.  அது குறைகிறது என்று புள்ளி விவரங்கள் தெரிவிக்கும்போது,  பொருளாதார நெருக்கடி முற்றுகிறது என்பதற்கான ஒரு ஆரம்பம் என எடுத்துக் கொள்ளலாம்.

       இன்றைய அமெரிக்க சந்தை இறக்கத்துடன் தான் முடியும் என தோன்றுகிறது.  ஐரோப்பிய சந்தைகளும் இன்று இறங்குமுகமாகவே முடிந்தன.  நம் சந்தை 90 புள்ளிகளுக்கு மேலாக முடிந்திருக்கிறது.  நாளை இறங்குமுகமாக முடிய வாய்ப்பிருக்கிறது.  அமெரிக்க வீழ்ச்சியை ஆசிய சந்தைகளும் நாளை எதிரொலிக்கும் என நினைக்கிறேன்.

       2200, here we come!

November 26, 2008 at 6:35 am 4 comments

25-11-2008

     மூழ்கிக் கொண்டிருந்த சிட்டி வங்கிக்கு பெயில்அவுட் என்று சில பில்லியன்கள் ஒதுக்கப்பட்ட காரணத்தினால், அமெரிக்க சந்தை 390 புள்ளிகள் மேலே ஏறியுள்ளது.  இன்றைய ஆசிய சந்தைகளும் உற்சாகமாக இருக்கின்றன. 

       அதனால்?  எல்லாப் பிரச்சினைகளும் முடிந்ததா?   இன்றைய தினம் நமது சந்தை ஏற்றத்துடன் காணப்பட்டு, ஏற்றத்துடனே முடியும்.  சந்தையின் காணப்படும் அடிப்படை பலவீனம் இன்னும் இருக்கிறது.  இந்த சிட்டி வங்கி பிரச்சினை முடிந்தால், வேறொரு பிரச்சினை வெளியே கிளம்பும்.  அநேகமாக ஆட்டோ செக்டார்.

      இந்த உயர்வை விற்பதற்கு பயன்படுத்திக் கொள்ளுங்கள்.  நாளைக்கு தரகர்கள் சிரித்த முகத்துடன் இருப்பதாக வணிகப் பத்திரிக்கைகளில் புகைப்படம் வெளிவரும். 

      நமது சந்தை இன்னும் இரு தினங்களில் ப்யூட்டசர்ஸ் முடிவு நாளை நெருங்கும் என்பதால், சந்தையின் பிற்பகுதியில் கரடிகள் ஆதிக்கம் செலுத்த முயலலாம். 

      மாலை விரிவாக எழுதுகிறேன்.

Good Morning to you All!

Post Market:

      அனைத்து சந்தைகளும் உயர்ந்து காணப்பட்ட நிலையிலும் கூட (ஆசிய மற்றும் ஐரோப்பிய) கரடிகள் சந்தையை தங்கள் ஆதிக்கத்திற்கு கீழ் போராடி கொண்டுவந்துவிட்டார்கள்.  இதனை அவர்களின் வெற்றி என பார்க்காமல் சந்தையின் பலவீனமாகவே எடுத்துக் கொள்ளலாம்.  இதுவரையில் 2200 என்ற நிலையில் மிக வலுவான சப்போர்ட் கொண்டிருக்கிறது.  இந்த நிலைக்கு செல்லும்போதெல்லாம் மீண்டும் ரெக்கவர் ஆகிவிடுகிறது. அமெரிக்க சந்தை உதவியுடன் என்றாலும், இந்நிலை மிக பிரமாண்டமாக தரகர்களால் சித்தரிக்கப்பட்டு வருகிறது.  நமது முதலீட்டாளர்களும் இதற்கு மேல் சந்தை போகாது என்ற நம்பிக்கையில் இருந்து வருகின்றனர்.  இது உடையும் போது கிட்டதட்ட சந்தை மேல் அவர்கள் வைத்திருந்த நம்பிக்கையும் தகர்க்கப்பட்ட நிலையில், உணர்ச்சி வசத்தில் எடுக்கும் முடிவுகள் சந்தையை மேலும் கீழே கொண்டு செல்லக் கூடிய வாய்ப்பு இருக்கிறது. 

       என்னைப் பொறுத்த வரையில் 2200 என்ற நிலை உடைப்பட்டாலும் (உடைபடும் என்ற நம்பிக்கை எனக்கு உண்டு) மீண்டும் அந்நிலைக்கு வெகு சீக்கிரம் வந்துவிடும்.  சரி, 54 புள்ளிகளை இழந்தற்கு ஒரே சோகப்பாட்டா என்கிறீர்களா?  நாளை சந்தை ஏறக்கூடிய வாய்ப்பு இருக்கிறது.  அந்த உயர்வில் நாம் இதனை நினைவில் வைக்க வேண்டும் என்பதற்காகவே.

Good Night!

November 25, 2008 at 6:20 am 5 comments

24-11-2008

     வெள்ளிகிழமை ஏறிய சந்தை இன்று ஏறாது என்றே நினைக்கிறேன்.  F & O முடியும் வாரம் இது.  ஆனால் அதன் பாதிப்பு செவ்வாய், புதன் அன்று தான் தெரியும் என்று நினைக்கிறேன்.  ஆசிய சந்தைகள் இறக்கமாக காணப்படுவதால், நமது சந்தையும் ஆரம்பத்தில் Selling Pressure சந்திக்கக் கூடும். 

      அதை சமாளித்து முன்னேறும் பட்சத்தில் 75 புள்ளிகள் வரை செல்லலாம்.  ஆரம்பத்திலேயே சமாளிக்க இயலாவிட்டால், சந்தை 100 புள்ளிகள் வரை இழக்கவும் வாய்ப்பு இருக்கிறது.

      அமெரிக்காவின் இரண்டாவது பெரிய வங்கியான சிட்டிபேங்க் தற்சமயம் மிகவும் மோசமான நிலையில் இருக்கிறது.  நாட்டின் வலுவான பொருளாதார நிலைக்கு வங்கித் துறை முதுகெலும்பு போன்றது.   வெள்ளிக்கிழமை ஏற்றத்தில் நமது சந்தையில் வங்கித் துறை போதுமான அளவு ஏறவில்லை என்பது குறிப்பிடதக்கது.

     சற்று எச்சரிக்கையாக இன்று சந்தையை தொடரவும். மாலை விரிவாக எழுதுகிறேன்.  நிப்டியானந்தர் புதிய பரிந்துரையை கொடுத்துள்ளார்.

Good Morning to you all!

Post Market:

      இன்றைய நம் சந்தை 14 புள்ளிகள் ஏற்றத்துடன் முடிந்திருக்கிறது.  ப்ளாட் என்று தான் சொல்ல வேண்டும்.  எந்த பக்கம் செல்வது என்று தெரியாத குழந்தையின் நிலைமைதான் நம் சந்தைக்கும். 

     அமெரிக்க நிலைமை வேறு மாதிரி இருக்கிறது.  சீன, ஜப்பான் நிறுவனங்கள் அடிவாங்கியிருக்கும் அமெரிக்க நிறுவனங்களை வாங்க  பார்க்கின்றன.  பெரிய தகவல் தொழில்நுட்ப நிறுவனங்களை வளைக்க இந்திய நிறுவனங்கள் முயல்கின்றன.  கிட்டதட்ட வல்லரசு பதவி பறிபோகும் நிலைமையில் இருக்கிறது அமெரிக்கா.  புஷ்ஷின் இந்த கடைசி மாதம் மிக போராட்டமான மாதமாக அமெரிக்க சந்தைக்கு இருக்க போகிறது.  அமெரிக்க டோ 6000 புள்ளிகளை தொட வாய்ப்பு உள்ளதாகவே கருதுகிறேன்.

      அப்போது இந்திய சந்தை?  மற்றவர்களை பார்த்து செல்லாமல் தனக்கென ஒரு பாதையை உருவாக்கும் முயற்சியில் ஈடுபட்டிருக்கிறது என தெரிகிறது. இது தொடருமா என்பதை பொறுத்திருந்து தான் பார்க்க வேண்டும்.

      2200 என்ற நிலையிலிருந்து நீண்ட கால முதலீட்டினை ஆரம்பிக்கலாம் என்று சொன்னேன். இப்போதும் சொல்கிறேன்.

November 24, 2008 at 7:17 am 4 comments

Older Posts


கோப்ரா தீவில் கோயாவி – முக்கிய அறிவிப்பு

இந்த கதையானது பூமி மற்றும் பிற கிரகங்களில் இருக்கும் எந்த உயிரினங்களின் மனதையோ, உடலையோ புண்படுத்தும் வகையில் எழுதப்படவில்லை. அவ்வாறு இருந்தால் அது தற்செயலே. இந்த கதையில் நடைபெறும் சம்பவங்கள் அல்லது வசனங்கள் பூமியில் நடக்கும் வாழ்க்கையை பிரதிபலிப்பவை அல்ல. அவ்வாறு நடப்பது புளுட்டோவில் புண்ணாக்கு கிடைக்க என்ன சாத்தியக்கூறோ அந்தளவிற்கு சாத்தியம். எதுக்குடே இப்டி எழுதுறே என்ற வகை பின்னுட்டங்கள் பிரசுரிக்கப்படாது. கள்ள ஐடீ பின்னுட்டங்கள் ஊக்குவிக்கப்படும்.

twit…twit…twit

  • Saw Noah. Very droll. Crowe lifts up the film in few moments. But why it is made. Only Creator can answer that. 3 years ago
  • If my office is attacked by ninjas right now, I might get a day's off. 4 years ago
  • Whatever the case, China domintes the Medal tally. As an asian, I'm proud. Why don't give Olympic Training to Army rather than Politicians 5 years ago
  • Just saw KV Anand's Maatyran trailer. Something struck on me! 5 years ago
  • @karthi_1 நல்லவேளை "முத்தமிழ் அறிஞர்களின் வாழ்வில் நடந்த சுவையான நிகழ்ச்சிகள்" உங்களிடம் இல்லை. ;) 5 years ago
November 2008
M T W T F S S
« Oct   Dec »
 12
3456789
10111213141516
17181920212223
24252627282930