Posts filed under ‘Fundamental Analysis’

பணவீக்கம் II

     பண்டமாற்று முறையை எளிதாக்க வேண்டி நாணயம் அறிமுகப்படுத்தப் பட்டது.  செம்பு, இரும்பு, வெள்ளி  போன்ற உலோகங்களில் நாணயங்கள் அச்சிடப்பட்டு உபயோகத்தில் விடப்பட்டன. தோலில் கூட நாணயம் தயாரிக்கப்பட்டன. அந்த நாணயங்களுக்குரிய மதிப்பு இடத்திற்கு இடம், நாட்டிற்கு நாடு மாறுபட்டது. ஒரு நகரத்தில் பெரிய மதிப்பைக் கொண்ட ஒரு நாணயம் மற்றொரு நகரத்தில் அதே மதிப்பீட்டில் பரிமாற்றத்திற்கு எடுத்துக் கொள்ளப்படுவதில்லை.  இந்த வரிசையில் தங்கம் சேர்ந்தபிறகுதான் பண்டமாற்று முறையில் மிகப் பெரிய முன்னேற்றம் ஏற்பட்டது எனலாம். உலகப் பொருளாதாரத்தில் கூட தான். அனைத்து நாடுகளுக்கும் கடற்பாதை கண்டுபிடித்த பிறகு, தங்கமே முக்கிய பண்டமாற்று நாணயமாக ஆயிற்று.  அதன்பின், உலக நாடுகள் அனைத்தும் தங்கத்தை அடிப்படையாக கொண்டே நாணயங்கள் வெளியிட ஆரம்பித்தன. உலக பொருளாதாரமே தங்கத்தை மையமாக வைத்து எழுப்பப்பட்டன. தங்கம் இத்தகைய இடத்திற்கு செல்ல முக்கிய காரணங்கள் : தங்கம் கிடைப்பதற்கரிய பொருள், நெடுநாள் உபயோகப்படுத்தலாம், எந்த சூழலிலும் போலி தயாரிப்பது அரிது. நமது நாட்டில் அரசர்கள்  புகழ்ந்து பாடும் புலவர்களுக்கு தங்கக் காசுகள் அடங்கிய பொற்கிழியை தருவார்கள் என படித்திருக்கின்றோம். தங்கம் அடர்த்தி அதிகமாதலால் எடை அதிகமாக இருக்கும். புலவர்கள் பொதுவாக ஸ்லிம்மாக தான் இருப்பார்கள். எவ்வாறு பொற்கிழியை துாக்கிக் கொண்டு போயிருக்க முடியும்?  மேலும் உலகத்தில் பல பகுதிகளிலும் இம்மாதிரி புகழ்ந்து பாடினால் பரிசு என்ற வழக்கம் இருந்ததா என்று தெரியவில்லை.

     பண்டமாற்று முறையை எளிதாகதான் பணம் கண்டுபிடிக்கப்பட்டது என்றால் அதை அச்சடித்து கொடுக்க வேண்டியது அரசின் கடமையாகும். முதல் பகுதியில் சொன்ன பணம் மற்றும் பொருட்களின் சமநிலையை பேண வேண்டியதும் அரசின் கடமை என்பதால், இஷ்டப்படி பணத்தை அச்சடித்து வெளியிட முடியாது. எவ்வளவு பணம் புழக்கத்தில் விடப்படுகிறதோ, அந்த அளவு மதிப்பிற்கு தங்கத்தை சேமிப்பில் வைத்துக் கொள்ள வேண்டும் என்ற முறை இருந்தது. இந்த முறைக்கு Gold Standard  என்று பெயர். இந்த முறையில் உள்ள நன்மைகள் என்னவென்றால், பணவீக்கத்தை மிக எளிதாக கட்டுப்படுத்த முடியும், பொருள்-பணம்-பரிமாற்றம் போன்றவற்றிற்கு சமநிலையை சீராக பேண முடியும். மிக வலுவான பொருளாதாரம் நாட்டில் ஏற்படும். ஆனால், சந்தை பொருளாதாரம் வளர வளர அதற்கேற்ப பணத்தை புழக்கத்தில் விட இயலவில்லை. பணத்தின் மதிப்பிற்கேற்ப தங்கத்தை சேமிப்பில் வைக்க வேண்டியிருந்ததே இம்முறையின் தோல்விக்கு காரணம் என சொல்லலாம். தற்போது இம்முறையை எந்த நாடுகளும் முழுவதும் பின்பற்றுவதில்லை. ஸ்விட்சர்லாந்தை தவிர. இதில்  Silver Standard என்ற முறை கூட உண்டு. 

      தற்போது அனைத்து நாடுகளும் பின்பற்ற தொடங்கியிருப்பது பியட் பணம் (Fiat Currency)  (கார் இல்லீங்க) என்ற முறையே ஆகும். பியட் என்ற சொல் இலத்தீன் மொழியில் வந்தது. அதற்கு அர்த்தம் “அடிச்சு பட்டய கிளப்புங்க”.  அரசாங்கம் நாட்டின் பொருளாதாரத்திற்கேற்ப பணத்தை அச்சடித்து விநியோகம் செய்யலாம். அச்சிடும் பணத்தின் மதிப்பிற்கேற்ப வேறு எந்த பொருளையும் கையிருப்பில் வைத்திருக்க அவசியமில்லை. இது எப்படியென்றால் பலசரக்கு கடை மாதிரி. முறையான கணக்கு ஏதும் சரிவர பேணப்படாமல், தினசரி ரொடேஷன் செய்து வணிகம் செய்வது மாதிரி. இது பற்றி மிக விரிவாக பேசலாம் என்றாலும், தற்சமயம் இதன் சில இருண்ட முகங்களை மட்டும் பார்ப்போம். அரசாங்கம் நீண்ட கால நோக்கில் திட்டங்களை செயல்படுத்தி சமநிலையை பேணாமல், குறுகிய கால நோக்கில், சரியான திட்டநோக்கு இல்லாமல் செயல்படுத்தினால் தீவிர பணவீக்க பிரச்சினை (Hyperinflation)  வர வாய்ப்பும் உண்டு. முதல் உலகப்போர் முடிந்த பிறகு ஏற்பட்ட தீவிர பணவீக்கத்தால் ஜெர்மனியில் குளிருக்கு தீ முட்ட பணக்கட்டுகளே பயன்படுத்தப்பட்டன. விறகு வாங்குவதை விட பணக்கட்டுகளை உபயோகிப்பது செலவு குறைவாக இருந்தது. இந்த முறை உலகில் ஒரு சமச்சீரற்ற பொருளாதார நிலையை உண்டாக்கும் என நம்பப்படுகிறது. ஆனால் வளர்ந்து வரும் உலக பொருளாதாரத்திற்கேற்ப இன்னும் Gold Standard முறையை பயன்படுத்த முடியாது என்றபோதிலும், இம்முறையை இன்னும் சீரமைக்க வேண்டும் என்று பொருளாதார நிபுணர்கள் ( இதில் என்னையும் சேர்த்துக் கொள்ளலாம்)  கருதுகின்றார்கள். இந்த முறையால் இருபத்தோராம் நுாற்றாண்டில் இனி நடக்கப்போவது எல்லாம் பொருளாதார போர்களே. எந்த நாடும் எந்த நாட்டின் பணத்தை வேண்டுமானாலும் மதிப்பிழக்க வைக்க முடியும். நாம் தலையில் துாக்கி வைத்து கொண்டாடும் அமெரிக்க டாலர்கள் கூட விதிவிலக்கல்ல.

      இப்போது தாய்நாட்டிற்கு திரும்புவோம். 1965-1977 வரை நம்நாட்டில் ஏகப்பட்ட பிரச்சினைகள்.  அந்த நேரத்தில் அயல்மொழிகளில் வரும் புத்தகங்கள், செய்திதாட்கள் அனைத்துமே இந்தியா பக்கீர்களும், மிகுந்த குழப்பமான சாலைப் போக்குவரத்தையும், நாகரிகமற்ற மக்களையும் கொண்டிருக்கும் நாடு என்ற கருத்திலேயே இருந்தன. சிறுவர், சிறுமியருக்கு பிரியமான டின் டின் சித்திர தொடரில் கூட அதன் கதாசிரியர் இத்தகைய கண்ணோட்டத்திலேயே எழுதியிருப்பார். தற்போதைய கார்ப்ரேட் இந்தியா பற்றி யாரேனும் கனவு கண்டு சொல்லியிருந்தால் அவரை ஒரு மாதிரியாகவே பார்த்திருப்பார்கள்.

     இந்திய-பாகிஸ்தான் போர் 1965 ( இரண்டாம் உலகப் போருக்கு பிறகு நடந்த மிகப் பெரிய இரானுவ யுத்தம் என்று இதை சொல்லலாம். அதன் பிறகு வந்த யுத்தங்கள் அனைத்திலும் அதி நவீன போர்க் கருவிகள் பங்கேற்க ஆரம்பித்தன),  வறட்சி, போன்ற சிக்கல்களில் நம்நாடு முழ்கி தத்தளித்துக் கொண்டிருந்தது. அமெரிக்கா மற்றும் அதன் சார்பு ஐரோப்பிய நாடுகள் அனைத்தும் பாகிஸ்தானை செல்லப்பிள்ளையாக பாவித்த கால கட்டம் அது. லால் பகதுார் சாஸ்திரி மரணமடைந்து இடைக்கால பிரதமர் பதவியேற்று முடித்து இந்திரா காந்தி பதவிக்கு வருகிறார். அரசாங்கம் ஒரளவு ஸ்திரதன்மை பெற்றது.  அந்த நேரத்தில் தான் நம்ம சூப்பர் ஸ்டார் கதவை திறந்துக் கொண்டு உள்ளே வந்து அறிமுகம் ஆவார்.(யோவ், இதுக்கும் பணவீக்கத்திற்கும் என்னய்யா சம்பந்தம் என்று கேட்காதீர்கள், நமக்கு பிடிச்ச பழமொழிகளை மட்டும் தான் கட்டுரையில்ல சேர்க்க வேண்டும் என்று  விதி இருக்கா).  1971-ல் பாகிஸ்தானுடன் மீண்டும் யுத்தம் செய்து பட்டையை கிளப்பி பங்களாதேஷ்-ஐ உருவாக்கினோம். ஒரு நாட்டை ஆரம்பத்திலிருந்து உருவாக்குவது என்பது எவ்ளவு கடினமான காரியம் என்று தெரியுமா! தற்போது ஈராக்கில் மாட்டிக் கொண்டு முழிக்கும் அமெரிக்காவை பார்த்தால் தெரியும். நாம் அதை 1972-லேயே செய்து விட்டோம். நம்முடைய பொருளாதாரம் அப்போது எந்த நிலையில் இருந்திருக்கும் என்பதை கற்பனை செய்து பார்த்துக் கொள்ளுங்கள். போதாக்குறைக்கு பொக்ரானில் அனுக்குண்டு வெடிக்க இரகசியமாய் திட்டங்களையும் தீட்டிக் கொண்டிருந்தோம். எவ்வளவு மிகவும் தைரியமான அரசாங்கம் அது!
     அந்த காலகட்டத்தில் 1975-ல்  ஒரு அமெரிக்க டாலர் எத்தனை ருபாய்க்கு சமம் என்று தெரியுமா? வெறும் எட்டே ருபாய் தான். அப்போது அனுகுண்டு வெடிக்கவில்லை, பெரிய அறிவியல் முன்னேற்றங்களை அடைந்திருக்கவில்லை. தகவல் தொழிற்நுட்பங்களில் …. அதை விடுங்கள், கணிப்பொறிகளே நாட்டில் விரல் விட்டு எண்ணக்கூடிய அளவில்தான் இருந்தன. இப்பொழுது நாம் உலக வல்லரசுகளின் மதிப்பிற்குரிய நாடு. ஒரு அமெரிக்க டாலருக்கு நாற்பத்தி நான்கு ருபாயாக பரிமாற்ற விலை இருக்கிறது. இதற்கிடையில் என்ன நடந்தது, நாம் சரியான பாதையில்தான் போய்க் கொண்டிருக்கின்றோமா, பணவீக்கத்தின் அடிப்படையை நாம் நன்றாக புரிந்துக் கொள்ள வேண்டுமானால் நமது ருபாயின் வரலாறையும் அறிந்துக் கொள்ள வேண்டும்.

July 13, 2008 at 10:40 am 4 comments

பணவீக்கம் I

    ஒவ்வொரு வெள்ளிக் கிழமையன்றும் பணவீக்கம் பற்றி எம்மாதிரியான புள்ளி விவரம் வரும் என்று எதிர்பார்ப்புடன் காத்திருக்கின்றோம். பண வீக்கம் பற்றி பல புள்ளி விவரங்கள் வாரா வாரம் சந்தையை அலைகழித்துக் கொண்டிருக்கின்றது. உண்மையில் பண வீக்கம் என்றால் என்ன அது எவ்வாறு கணக்கிடப்படுகின்றது என்று பார்த்தால் வெள்ளிக் கிழமைதோறும் நண்பகல் 12.00 மணிக்கு வரும் ஒரு வித பயம் தெளியும் என்று நினைக்கின்றேன். சில அடிப்படையான விஷயங்களை இத்தொடர் கட்டுரையில் விளக்க முயல்வதால், இக்கட்டுரையை Fundamental Analysis  பகுதியில் சேர்க்கலாம் என்று இருக்கின்றேன்.

     பல வயதான மனிதர்கள் இவ்வாறு பேசுவதை நீங்கள் கண்டிப்பாக கேட்டிருப்பீர்கள் “அந்த நாளையிலே இரண்டு ருபாய்க்கு டவுனுக்கு போய் ஒரு சினிமா பார்த்துவிட்டு, பீம விலாஸ்ல நல்லா சாப்பிட்டுவிட்டு, மஸ்தான் கடையிலெ ஒரு மசாலா பால் சாப்டுட்டு கடலையை கொறிச்சுகிட்டே ஊர் வரைக்கும் வந்துற முடியும்”.

     தற்போதைய சூழலில், இன்னும் கூட இரண்டு ருபாய் இருந்தால்தான் கடலையையாவது வாங்கமுடியும். எவ்வளவு வித்தியாசம்? இப்போதும் டவுன்,சினிமா தியேட்டர், உணவகங்கள், மசாலா பால் எல்லாம் இருக்கின்றது. விலை மட்டும் பல மடங்காகியிருக்கிறது. கேட்டால் தெரிந்தவர்கள் கூறும் காரணம், பணவீக்கம். தெரியாதவர்கள் கூறும் காரணம், அப்போ நாங்க கஷ்டப்பட்டு சுதந்திரம் வாங்கி கொடுத்தோம், அரசியல்வாதிகள் வந்து கெடுத்து விட்டார்கள். கருப்புப் பண முதலைகள் நிறைய இருக்கின்றன. எங்கும் ஊழல். யாருக்கும் பொறுப்பு இல்லை. நாற்பது ருபாய் சம்பளத்தில் ரொம்ப சுபிட்சமாக இருந்தேன். In Nineteen Fifty Five …. என்று பயங்கரமாக ஆரம்பித்து விடுவார்கள்.

    உண்மையில் பணவீக்கம் ஆதிகாலந்தொட்டே இருந்து வந்திருக்கிறது. ஒரு அடிப்படையான விளக்கத்தினை முதலில் பார்க்கலாம். பணவீக்கம் என்றால் பணம் வீங்கி (அது என்ன கட்டியா?) போகுதல். அதாவது பெரியதாக ஆகுதல் அப்படியென்று மிகவும் அடிப்படையான பொருள் கூட கொள்ளலாம். சாதாரணமாக இருக்கிற ஒரு பகுதி தீடிரென பெரியதாக ஆகுதல். இதைப் பற்றி நாம் ரொம்ப பின்னாடி போய் பார்ப்போம்.
     மன்னர் காலங்களில் பணப்புழக்கம் என்றே கிடையாது. மிகவும் அடிப்படையான பண்டமாற்ற முறையில்  தான் வியாபாரம் நடக்கும். இரண்டு கோழிகளுக்கு அரை முட்டை நெல்/கால் முட்டை காய்கறிகள்/ஒரு தங்க நாணய வில்லை என்ற ரீதியில் வியாபாரம் நடக்கும். மக்கள் தங்களிடம் உள்ள உபரியாக உள்ள ஒன்றை கொண்டு அவர்களுக்கு தேவைப்படும் பொருட்களை வாங்கிக் கொண்டு இருந்தார்கள். எல்லாம் நல்லபடியாக தான் நடந்துக் கொண்டிருந்தது. ஒரு சின்ன சிக்கல் என்னவென்றால் ஒவ்வொரு ஏரியா ராஜாக்களும் ரொம்பவும் மானமிகு, வீரமிகு சிங்கங்களாக இருந்ததுதான். என் மீசையைப் பற்றி தவறாக பேசிய அண்டை நாட்டு மன்னனின் நாக்கை வெட்டி ஊறுகாய் போட்டுவிட்டுதான் மறுவேலை என்று வெட்டிபந்தா பேசி முனுக்கென்றால் போருக்கு தயாராக இருந்தார்கள். இந்த மாதிரி வெட்டிப்போர்களால் நாட்டின் பண்டமாற்று முறை மிகவும் பாதிக்கப்பட்டது. கத்தி கபடாவுக்கெல்லாம் மவுசு ஏறிபோய்விட்டது. இதை சமநிலைப்படுத்த அப்போது ரொம்ப கிராக்கியாக இருந்த தங்கம் ( இப்போதுகூட தான்), வெள்ளி போன்ற உலோகங்களைக் கொண்டு வில்லை தயார் செய்து பண்டமாற்று முறையை மேம்படுத்திக் கொண்டார்கள். ஒரு ஏரியா ராஜா அடுத்த பேட்டையில் காலை ஊன்றியவுடன் அந்த ஏரியா காசெல்லாம் செல்லாக் காசாகிவிடும். இந்த மாதிரி தான் ஏரியா பொருளாதாரம் இருந்தது.

      இப்ப அப்படியே தசாவதாரம் ஸ்டையில்ல 21-ம் நுாற்றாண்டிற்கு வருவோம். நிலைமை சிறிது கூட மாறவில்லை. ஏரியாவெல்லாம் பெரிசா ஆயிருக்கு. அவ்வளவுதான். அதே வெட்டி பந்தா. வெட்டிப் போர்கள். பண்டமாற்று முறை தான். சிறிய வித்தியாசம் : பண்டமாற்று முறை பணத்தை (Currency) அடிப்படையாக வைத்து நடக்க ஆரம்பித்தது.  அதனை மேம்படுத்தி, வழிநடத்த வங்கி போன்ற அமைப்புகள் ஏற்படுத்தப்பட்டன.

      இப்போது ஒரு சின்ன கற்பனை : நம்நாட்டில் பதினைந்து கோடி ருபாய் பணம் இருந்து, இருபது கோடி ருபாய்க்கு நாடு பொருட்களை உற்பத்தி செய்கின்றது  (விவசாயம், தொழிற்சாலை என்று எல்லா துறைகளையும் சேர்த்து) என்று வைத்துக் கொண்டால் எது குறைவாக கிடைக்கின்றதோ அதற்கு தான் கிராக்கி இல்லையா? பணத்தின் மதிப்பு அதிகரித்துவிடும் அல்லவா. இவ்விரண்டையும் ஒரு தராசில் வைத்தால் எது குறைவோ அது மேலேறிவிடும். மேலேறிவிடுவதற்கு தான் மவுசு அதிகம்.  இந்த சமநிலையை புரிந்துகொண்டால் பணவீக்கத்தின் அடிப்படையை வெகு எளிதாக புரிந்துக் கொள்ளலாம்.

     இந்த சமநிலையை எவ்வாறு அரசாங்கம் பேணி வருகின்றது?  அரசாங்கம் எந்த முறைகளில் பணவீக்கத்தை கட்டுப்படுத்தி வருகின்றது? என்று வரும் வாரங்களில் பார்க்கலாம். பொருளாதார பாடங்களில் பண வீக்கத்தைப் பற்றி படிப்பது மிகவும் மந்தமான காரியம். (பொருளாதாரம் முழுவதுமே இப்படிதான் என்று கூறும் ஒரு சாராரும் இருக்கின்றார்கள்) . இந்த வகுப்புகள் எல்லாம் ஒரு தவ சாலை மாதிரி ஆகிவிடும். ஆசிரியர் மந்திர உச்சாடனம் சொல்வது போல் ஏதாவது சொல்லிக் கொண்டிருப்பார்.  மாணவர்கள் எப்போதும் ஒருவித யோக நிலையில் இருப்பார்கள். இதனாலேயே யாராவது ஒருவர் பி.ஏ (பொருளாதாரம்) படிக்க போகின்றேன் என்று சொன்னால் இச்சமுகம் அவர்களை பரிதாபமாக பார்க்கும் நிலை ஏற்பட்டிருக்கின்றது.  ஆனால் இது பற்றிய அறிவு அவசியம் தெரிந்து கொள்ள வேண்டிய ஒன்றாக இருப்பதனால் கூடிய வரையில் எளிய வகையில் எழுத முயற்சி செய்கின்றேன்.

July 9, 2008 at 10:31 pm 9 comments

#5 Fundamental Analysis – Competition

ஒரு குழுமத்தினை தேர்ந்தெடுத்து அக்குழுமத்தின் கணக்கு புத்தகங்களை பார்த்து முதலீடு செய்வதற்கு ஏற்ற குழுமமா என்று பார்ப்பதற்கு Fundamental Analysis பயன்படுகிறது. நமது தேசிய பங்கு சந்தையில் 500 மேலான ( சின்ன வயதில் நான் கற்றுக் கொண்ட ஒரு வித்தையை நான் உங்களுக்கு விளக்கப் போகிறேன். புள்ளி விவரங்கள் சிறிது குழப்பமாகவோ, படித்தது மறந்து விட்டாலோ, தேசிய பங்கு சந்தையில் எத்தனை குழுமங்கள் பட்டிலிடப்பட்டிருக்கிறது என்பதை மிகச் சரியாக தெரிந்து கொள்வதற்கு சோம்பலாக இருந்தாலும், குறைந்த ஒரு எண்ணிக்கையை சொல்லி அதற்கு மேலாக என்று சொல்வது உத்தமம். இக்கட்டத்தில் 1000 என்பது ரிஸ்க். சரியான எண்ணிக்கை உங்களுக்கு தெரிந்தால் சொல்லுங்கள்)  குழுமங்கள் பட்டிலிடப்பட்டிருக்கின்றன. அவற்றில் அனைத்தையும் தேர்ந்தெடுத்து அலசிக் கொண்டிருக்க முடியாது. இத்தனை எண்ணிக்கையிலிருந்து ஒரு குழுமத்தை தேர்ந்தெடுப்பது நிறைய முறைகளில் தேர்ந்தெடுக்கலாம். அவற்றில் ஒன்று போட்டி (Competition) .

 இவற்றில் முன்று விதமாக குழுமங்களை பிரிக்கலாம் :

1) போட்டியே இல்லாத சிங்கம்

2) போட்டியென்று வந்து விட்டா சிங்கம்

3) போட்டியென்று வந்து விட்டா அசிங்கம்

 

     முதல் வகையை பற்றி பார்ப்போம். இவ்வகை குழுமங்களை மோனோபொலி (Monopoly)  என்று சொல்வார்கள். பொதுவாக இந்த வகை குழுமங்கள் அரசு மற்றும் அரசு சார்புடையதாகவே இருக்கும். உதாரணத்திற்கு, இந்திய இரயில்வே (Indian Railways) . தனியார் குழுமங்கள் வேறு யாரும் இரயில்வே உடன் போட்டி போட முடியாது. தனியார் இருப்புப் பாதைகள் ஏதும் ஒரு ஊரிலிருந்து மற்றொரு ஊருக்கு நம் நாட்டில் இதுநாள் வரை அமைத்தது இல்லை. தனியார் துறை நிறுவனங்களும் சில கால கட்டத்திற்கு இந்த நிலையில் இருக்கலாம். ஆனால் சிறிது காலத்திற்கு மட்டுமே அவர்களால் நீடிக்க முடியும். பொதுவாக, அரசு தவிர வேறு எந்த தனியார் நிறுவனங்களும் இந்த நிலையில் இருப்பதற்கு அரசாங்கம் அனுமதிக்காது. உதாரணத்திற்கு, மைக்ரோ சாப்ட் (Microsoft)  நிறுவனம் வின்டோஸ் மென்பொருள் (Windows Operating System) கண்டுபிடித்தபிறகு நிறைய ஆபரேடிங் சிஸ்டங்கள் இருந்தாலும், இந்தியாவில் இந்த நிலையை நிறைய காலம் Microsoft அனுபவித்தது. வின்டோஸ் தவிர வேறு ஆபரேடிங் சிஸ்டம் நம்மால் நினைத்துக் கூட பார்க்க இயலாமல் இருந்தது. தற்போது லினக்ஸ், ஆப்பிள் மெக் போன்று பல ஆபரேடிங் சிஸ்டங்கள் வந்து விட்டாலும் இன்னும் வின்டோஸ் நமது நாட்டில் கொடிகட்டி பறந்து கொண்டிருக்கிறது. ஆனால் வருங்காலத்தில் இந்நிலை கண்டிப்பாக மாறும்.
       இவ்வகை குழுமங்களில் போட்டியாளர் என்று யாரும் இன்மையால் தாராளமாக முதலீடு செய்யலாம் (பெரும்பாலும் அரசு நிறுவனங்கள் என்பதால் பங்கு சந்தையில் பட்டியலிடப்படுவதில்லை). அரசாங்க கொள்கை மாறி சரியான போட்டியாளர்கள் களத்தில் இறங்க தொடங்கினால் மீண்டும் நம் முதலீட்டினை மறுபரிசீலனை செய்தே ஆக வேண்டும்.

      இரண்டாவது வகையானது ஒரு ஆரோக்கியமான சந்தைக்கு எடுத்துக் காட்டு. ஒரு குழுமம் செய்யும் வணிகத்தை அதன் போட்டியாளர்களுடன் ஒப்பிட்டு அதன் மேலாண்மை சரியான திசைக்கு அக்குழுமத்தை வழிநடத்தி செல்கின்றதா என எளிதில் கண்டறியலாம். நிறைய உதாரணங்கள் உள்ளன. பயனாளர்கள் பொருள் உற்பத்தியில் (Fast Moving Consumer Goods FMCG) ஹீந்துஸ்தான் யுனிலிவர் (Hindustan Unilever)  மற்றும் ஐ.டி.சி. (I.T.C) நிறுனங்களை எடுத்துக் கொள்ளலாம். இவ்விரண்டும் மேற்கண்ட துறையில் தலைமை பொறுப்பினை வகிக்கின்றன. ஆனால், மாரிகோ (Marico), டாபர் (Dabur)  மற்றும் கோத்ரெஜ் (Godrej) போன்ற போட்டியாளர்களும் உண்டு. சிறிது அசந்தாலும் கூட, அவர்கள் முதலிடத்தை பிடிக்க கடுமையான போட்டி போடுவார்கள்.
      இவ்வகை குழுமங்களில் துறை தலைமை பொறுப்பை வகிக்கும் குழுமத்தில் முதலீடு செய்வதை விட முதலிடத்தை பிடிக்க போராடும் சிறிய நிறுவனங்களில் முதலீடு செய்வதே சிறந்தது. மேலும் முதலீட்டினை வருடந்தோறும் பரிசீலனை செய்வது முக்கியம். குறிப்பாக ஆரோக்கியமான போட்டியுள்ள துறையானது மேலும் வளர்ச்சி அடைய வாய்ப்பு இருந்தால் ஒன்றுக்கு மேற்பட்ட குழுமங்களில் முதலீடு செய்யலாம். உதாரணத்திற்கு, காப்பீடு (Insurance)  பொறுத்த வரை நம்நாட்டில் 25 (முதல் பாராவில் சொன்ன வித்தை) சதவிகிதம் மட்டுமே வணிகம் நடந்துள்ளது. காப்பீடு பற்றி ஒரு விழிப்புணர்ச்சி பரவலாக ஏற்பட்டுள்ளது. காப்பீட்டுத் துறையில் எல்.ஐ.சி. (L.I.C)  மட்டுமே கோலோச்சி கொண்டிருந்தது. அச்சமயங்களில் எல்லா காப்பீடு முகவர்களும் “நீங்க இப்ப இருங்கீங்கல்ல, தீடீரென்று போய் சேர்ந்துவிட்டீங்கனா ” பேச்சை ஆரம்பிப்பார்கள். ஆனால் தனியார் போட்டியாளர்கள் பஜாஜ் (Bajaj Allianz) , டாடா (Tata Aviva) , ரிலையன்ஸ் (Reliance Money), பாரதி (Bharti AXA) என்று வந்த பிறகு மேற்கண்ட அதே விஷயத்தை மிக நுட்பமாக சொல்கின்றார்கள். குறிப்பாக பாரதி விளம்பரம் பார்த்திருப்பீர்கள்.

 

     முன்றாவது வகை குழுமங்களை பொறுத்தவரை முதலீட்டை தவிர்ப்பது நல்லது. இவ்வகை குழுமங்கள் ஆரம்ப காலத்தில் போட்டியின்று வெற்றிகரமாக செயல்படும். ஆனால் போட்டியாளர்கள் களத்தில் இறங்கி விட்டால் “கைபுள்ள” மாதிரி ஆகிவிடும். இதற்காக முன்றாவது வகையை சேர்ந்த குழுமங்கள் அனைத்தும் மோசமானவை என்று கருதக்கூடாது. இலாபம் ஈட்டும் என்றாலும், போட்டியை சமாளிக்க இயலாமால் தடுமாறும் என்ற கருத்தில் எடுத்துக் கொள்ளலாம். உதாரணம், துார் தர்ஷன் (Doordarshan) . ஒலியும் ஒளியும், வயலும் வாழ்வும், திரைமலர்,எதிரொலி இதெல்லாம் இன்னும் எத்தனை பேருக்கு நினைவு இருக்கும். தனியார் தொலைக்காட்சிகள் வராத நாட்களில் கொடிகட்டி பறந்தது. இத்தனைக்கும் துார்தர்ஷன் பார்ப்பதற்கு முற்றிலும் இலவசம். இன்றைய பதினைந்து வயது சிறுவர்களுக்கு இந்நிகழ்ச்சிகளின் பெயரை சொன்னால் முற்றிலும் அந்நியமாக தெரியும். இதிலிருந்தே தெரியும் போட்டியாளர்களின் வருகை ஒரு குழுமத்தை எவ்வாறு மாற்றி விட்டதென்று.

 

June 24, 2008 at 9:37 pm 1 comment

#04 Fundamental Analysis – The Company II

     முதல் பகுதியில் ஒரு குழுமம் எப்படி உருவாக்கப்படுகிறது என்று பார்த்தோம். இப்பகுதியில் ஏன் ஒரு குழுமம் உருவாக்கப்படுகிறது என்று பார்ப்போம். இப்பகுதியில் குழுமம் என்று குறிப்பிடப்படுவது Public Limited Company என கொள்ளலாம்.

     திரு. X என்பவர் ஒரு வணிகத்தில் மிக தேர்ந்த அறிவு கொண்டவர் மற்றும் அந்த வணிகத்தை தொடங்கி நடத்தும் அளவுக்கு பணம் படைத்தவரும் கூட. ஒரு குழுமத்தை தொடங்கி தான் அவர் அதை நடத்த வேண்டுமா? அதற்கு என்னென்ன சிக்கல்கள் பட வேண்டும்? முதலீட்டாளர்களிடம் அவருடைய திட்டத்தை விளக்கி நிதி திரட்ட வேண்டும் (Initial Public Offer) . ஒவ்வொரு காலாண்டும் அவர்களுக்கு வரவு செலவு அறிக்கைகள் (Quarterly Satements)  கட்டாயம் அனுப்ப வேண்டும். முக்கியமான ஒன்று, வரும் இலாபத்தில் அவர்களுக்கும் பங்கு (Dividends) கொடுக்க வேண்டும். இவ்வளவு சிரமங்களுக்கிடையில் எதற்காக அவர் அந்த வணிகத்தை ஒரு குழுமம் ஆரம்பித்து நடத்த வேண்டும்? அவரிடம் பணமும், வியாபார அறிவும் இருக்கையில் அதை தனி வணிகமாகவே நடத்தலாமே! எத்தனை டீக்கடைகள், மளிகை கடைகள், டிபார்மென்டல் ஸ்டோர்ஸ், காஸ்ட் பிரைஸ் ஷாப் அவ்வாறு நடத்தப்படுகின்றன.

     திரு.X என்பவர் ஆரம்பிக்கும் வணிகம் ஒரு கிராமத்தின், நகரத்தின் ஒரு பகுதியில் மட்டுமே நடைபெறும் என்று முடிவு செய்து ஆரம்பித்தால், குழுமம் ஆரம்பிக்க தேவையில்லை. ஆனால், வருங்காலங்களில் அதை பெரிய அளவில் விரிவுபடுத்தும் எண்ணமும், நாட்டின் பல பகுதிகளிலும் ஆரம்பிக்கும் வகையில் நீண்ட கால தொலைநோக்கு திட்டமும் இருக்கும் பட்சத்தில் அவ்வணிகத்தினை குழுமம் முலம் செய்வது தான் மிகச் சிறந்த வழியாகும்.

    தனி நபர் வணிகம் நடத்தும்போது, அவ்வணிகம் மீது அரசு விதிக்கும் வரிகளை எல்லாம் அவர்களே கட்டவேண்டும். அதன் நிலுவைகளுக்கும் அவரே பொறுப்பு. வணிகம் பொருட்டு வாங்கப்படும் சொத்துக்கள் அனைத்தும் அவர் பெயரிலேயே பதியப்பட வேண்டும். இலாபத்திற்கு வருமான வரி அவர் கணக்கிலேயே கழிக்கப்படும். உள்ளுரில் சொத்து வாங்கும்போது பிரச்சினையில்லை. வெளி மாநிலங்களில் வாங்கும்போது, ஏகப்பட்ட சட்ட சிக்கல்களை எதிர்கொள்ள நேரிடும். அவ்வணிகத்தினை விரிவுபடுத்த நிதி தேவைப்பட்டால் அதற்கு அவர்தான் நிதி ஏற்பாடு செய்ய வேண்டும். திரு X நடத்தும் வணித்தினை விரிவு படுத்த அவர் மற்றவர்களிடம் ( வங்கிகள், தனி நபர்கள்) அக்கடன்கள் அவர் வாங்கிய கடன்களாகவே எடுத்துக் கொள்ளப்படும். அதாவது, வியாபாரத்தில் இலாபமோ, நஷ்டமோ எது வந்தாலும் திரு X  மட்டுமே அக்கடன்களுக்கு பொறுப்பு. தவிர்க்க முடியாத சில நேரங்களில் கடன்களை அடைக்க நேரிடும் பட்சத்தில் அவருடைய சொந்த அசையும், அசையா சொத்துக்களும் கடனை அடைக்க கணக்கில் எடுத்துக் கொள்ளப்படும்.

     ஓரு குழுமம் என்பது ஆரம்பிப்பது எதற்காக என்றால், இந்திய குழும சட்டத்தின்படி, ஒரு குழுமம் என்பது ஒரு தனி நபர் போல். திரு  X போல் என்று வைத்துக் கொள்வோம். இந்த குழுமம் என்பது பங்குகளால் ஆனது. பெரும்பான்மையான பங்குகளை திரு X என்பவரே வைத்துக் கொள்ளலாம். ஒரு குழுமம் தன் பெயரில் சொத்துக்ளை நிர்வகிக்கலாம். வங்கியில் கடன் வாங்கலாம். வருமான வரி மற்றும் இதர வரிகளை தனது பெயரிலேயே கட்டலாம். அரசாங்கம் அறிவிக்கும் வரி சலுகைகளை அனுபவிக்கலாம்.  என்ன, கல்யாணம் மட்டும் தான் செய்ய முடியாது. இதனால் என்ன நன்மை என்று பார்த்தால், இந்தியா மற்றும் வெளிநாடுகளில்கூட ஒரு குழுமத்தின் பெயரில் சொத்துக்களோ அல்லது மற்றொரு குழுமத்தையோ வாங்க முடியும். எவ்வித சட்ட சிக்கல்களும் எழாது.  குழும விரிவாக்கத்திற்கு பணம் தேவையென்றால், எளிதில் அதை முதலீட்டாளர்களிடமிருந்தே திரட்டலாம் (Rights Issue). இலாபத்தினை பிரிக்கும்போது கூட அதிக பங்கு வைத்திருப்பவர்களுக்கு அதிக ஈவுத் தொகை (Dividend)  கிடைக்க வாய்ப்பு உண்டே. சிவில் வழக்குகளில்  ஒன்றுக்கு மேற்பட்ட நீதிமன்றங்களில் ஆஜராக வேண்டுமென்று வைத்துக் கொண்டால், தனி நபர் வணிகம் நடத்துபவர் ஒரே நேரத்தில் ஒன்றுக்கு மேற்பட்ட இடங்களில் இருக்க முயல வேண்டும். குழுமமோ தனது பெயரிலேயே ஒன்றுக்கு மேற்பட்ட நீதிமன்றங்களில் ஆஜராகலாம்.  வங்கிகள் மற்றும் தனியார் நிதி நிறுவனங்களில் ஒரு குழுமம் தன் பெயரில் கடன்கள் வாங்கலாம். கடன்களை திரும்ப செலுத்த முடியாத நேரங்களில், குழுமத்தின் பெயரில் இருக்கும் அசையும், அசையா சொத்துக்கள் மட்டுமே கணக்கில் எடுத்துக் கொள்ளப்படும்.

    நிறுவனர்களுக்கு வயதாகி வணிகத்திலிருந்து ஓய்வு பெறலாம் என்று நினைத்தால் உடனடியாக உங்கள் கையிருப்பில் உள்ள பங்குகளை விற்றுவிட்டு வெளியேறலாம். அக்குழுமத்திற்காக அவர் போட்ட முதல் உடனடியாக ரொக்கமாக மாற்றிக் கொள்ளலாம். ( அந்த நேரத்தில் அப்பங்குகள் சந்தையில் என்ன மதிப்பில் இருக்கின்றதோ அந்த மதிப்பில்) அல்லது அவருடைய குடும்பத்தாருக்கு மாற்றியும் கொடுக்கலாம்.  முக்கியமான விஷயம், காளை சந்தைகளில் அக்குழுமத்தில் உள்ள உங்கள் பங்குகளை ஒரு குறிப்பிட்ட சதவிகிதம் விற்றுவிட்டு, கரடிகள் சந்தைகளில் வாங்குவது முலம் பெரும் இலாபம் ( இவ்வாறு பெறும் இலாபத்திற்கு குழுமம் வரி கட்டாது, சம்மந்தப்பட்ட நபர் தான் வரி கட்ட வேண்டும்) பெறலாம். இன்னும் சில மாதங்களில் நம் நாட்டில் உள்ள சில பெரிய குழுமங்களின் பிரமோட்டர்கள் இது போன்று தான் செய்ய போகின்றார்கள். ஒரு குழுமத்தின் பங்குகளை வாங்குவதன் முலம் நாமும் அக்குழுமத்தின் அங்கத்தினராக ஆகிவிடுகின்றோம். அக்குழுமத்தின் வளர்ச்சியில் நமக்கு நம்பிக்கை இருக்கும் பட்சத்தில் எந்த ஏற்ற இறக்கங்களிலும் விற்காமல் கையிருப்பில் வைத்திருக்கும் பட்சத்தில் நாமும் அக்குழுமத்தின் பிரமோட்டர் மாதிரி ஆகிவிடுவோம். என்ன அவர்களிடம் உள்ள பங்கு எண்ணிக்கை நம் கையிருப்பில் உள்ளதை விட சில இலட்சங்களே அதிகமாக இருக்கும்.

 

June 23, 2008 at 5:47 pm 1 comment

#4 Fundamental Analysis – The Company

    ஒரு குழுமத்தின் கணக்கு வழக்கு பற்றி தெரிந்து கொள்ளும் முன் குழுமம் என்பதை பற்றி சிறிது தெரிந்து கொள்வது நல்லது என்று நினைக்கிறேன்.

   ஒரு குழுமம் என்பது எவ்வாறு, ஏன்  தொடங்கப்படுகின்றது என்று பார்ப்போம்.

     ஒன்று அல்லது ஒன்றுக்கு மேற்பட்ட நபர்களின் அறிவில் உதயமாகும் எண்ணங்களை (spark)  செயல்படுத்தும் போது உருவாவது தான் ஒரு குழுமம்.  ஆனால் அவர்களிடம் அச்சமயத்தில் அவ்வெண்ணங்களை செயல்திட்டத்தில் கொண்டுவர முதல் தேவையான முதல் (Capital) இல்லாமல் இருக்கலாம். அச்சமயத்தில் அவர்கள் வேறு யாரிடம் போவார்கள்? மக்களிடம் போய் அவர்களின் திட்டங்களை எடுத்துச் சொல்லி ஒரு குழுமத்திற்கு தேவையான முதலை (Initial Public Offer) திரட்டுவார்கள்.

      தேவையான முதலை சிறிய பங்குகளாக பிரித்து  பணம் திரட்டுவார்கள். அவ்வாறு திரட்டுகையில் அக்குழுமத்தின் பெரும்பாலான பங்குகளை ( 25 சதவிதம் முதல் 51 சதவிதம் வரை)  பிரமோட்டர்களின் கையிருப்பில் இருக்கும். சமயத்தில் வேறு யாரேனும் இத்திட்டங்களின் எதிர்காலத்தை கணித்து மொத்தமாகவும் முதலீடு செய்வார்கள். இன்போஸீஸ் (Infosys) மற்றும் ரிலையன்ஸ் (Reliance)  போன்ற குழுமங்கள் இவ்வாறு உருவாக்கப்பட்டவை. அக்குழுமங்களை துவக்க புரமோட்டர்களிடம் ( திரு நாராயணமுர்த்தி மற்றும் அம்பாணி)  தேவையான முதல் இல்லை. மேலும் அவ்விரு குழுமங்களும் மேற்கொள்ளவிருக்கும் வணிகம் லாபமுள்ளது என்று நிறைய பேர் அச்சமயத்தில் கருதவில்லை. வெளிநாட்டிலிருந்து இறக்குமதியாகும் துணிதான் தரமுள்ளது, நம்முர் துணி சாயம் போகும் என்ற எண்ணம் மக்களிடத்தில் இருந்த காலத்தில் தான் ரிலையன்ஸ் நிறுவனம் துவங்கப்பட்டது. மணிரத்னம் இயக்கிய “குரு” திரைப்படத்தில் ஏறக்குறைய இளவயது அம்பானியை அபிஷேக் பச்சன் பிரதிபலித்திருப்பார். கணினி என்றால் என்ன என்று கிட்டத்தட்ட 95 சதவிதம் மக்கள் தெரியாமல் இருந்த காலகட்டத்தில் தொடங்கப்பட்டது இன்போஸீஸ். நம்நாட்டில் இருந்த சிறந்த வர்த்தக முன்னோடிகள் என்று நாம் அவர்களை சொல்வதற்கு காரணமே இதுதான். டாடா, பிர்லா, நந்தா போன்றவர்கள் Legends. அவர்கள் கதை தனி.

   Initial Public Offer (IPO)  ல் அவ்விரு குழுமங்களும் முழுவதுமாக subscribe ஆக வில்லை என்பது உங்களுக்கு தெரியுமா? தற்போது வெளியிடப்பட்ட ரிலையன்ஸ் பவர் பங்கு வெளியீட்டில் 2 மடங்குகளுக்கு  மேல் subscribe ஆனது. சில குழுமங்கள் ஆரம்பிக்கும்போது துவக்க செலவுகள் (Initial Costs) அதிகமாக இருக்கும். தளவாட சாமான்கள் வாங்கிய செலவுகள் அதிகமாக இருக்கும். முதல் சில காலாண்டுகளுக்கு நஷ்டத்தையே காட்டும். உதாரணத்திற்கு டாடா டெலிசர்விஸஸ் ( Tata Teleservices Maharashtra Ltd) . மகாராஷ்ட்ரா மற்றும் கோவா போன்ற மாநிலங்களில் தொலைபேசி மற்றும் இணைய தொடர்புகளை இக்குழுமம் கொடுத்து வருகிறது. இக்குழுமம் கணினி மற்றும் இணைய தொடர்புகளை கொடுப்பதற்காக கேபிள் மற்றும் எலக்ட்ரானிக் தளவாட செலவுகள் அனைத்தும் குழுமம் தொடங்கையில் நிரந்தர செலவாக (Fixed Cost) செய்யப்பட்டுள்ளதால், இதுநாள்வரை இக்குழுமம் நஷ்டத்தையே காட்டி வருகிறது. ஆனால், ஒவ்வொரு காலாண்டிலும் வருவாய் பெருகி, நஷ்டம் குறைந்து வருவதை அக்குழும லாப நஷ்ட கணக்கிலிருந்து தெரிந்து கொள்ளலாம். அடுத்த சில காலாண்டுகளில் இக்குழுமம் லாபத்தை நோக்கி நடை போட ஆரம்பித்து விடும்.
     சில குழுமங்கள் முழு வீச்சில் உற்பத்தியை ஆரம்பிக்க சில காலாண்டுகளாகவது பிடிக்கும். அக்குழும பங்குகள் அனைத்தும் சந்தை ஏற்ற இறக்கங்களில் வேகமாக ஊசலாடும். இதற்கு உதாரணம் ரிலையன்ஸ் பெட்ரோலியம் (Reliance Petroleum) . கச்சா எண்ணெய் சுத்திகரிப்பு (Refinery) செய்யும் வணிகத்தை மேற்கொண்டு பங்கு வெளியிட்டது. இக்குழுமத்தின் அதிக விலை குறைந்த விலை என்று பார்த்தால் ரு300/75. மேலும், சந்தை சரிவுகளில் மிக வேகமாக இறங்கி ஏற்றங்களில் ஏறியும் வந்துள்ளது. இந்தியாவில் அதிக அளவு கச்சா எண்ணெய் சுத்திகரிப்பு செய்யும் நிறுவனமாக இன்னும் ஆறு மாதங்களில் விளங்கபோகிறது. நவம்பர் 2008 முதல் செயல்பட துவங்கும் என அதன் தலைமை நிர்வாகி அறிவித்திருக்கிறார். இதைபோலவே ரிலையன்ஸ் பவர் (Reliance Power).
     மேலே குறிப்பிடப்பட்ட இரு வகை குழுமங்களில் முதல் வகை குழுமங்கள் ஆரம்பத்தில் குறைந்த விலையில் கிடைத்தாலும் சில காலாண்டு அறிக்கைகளுக்கு பிறகு வணிகத்தை பொருட்டு லாபம் ஈட்ட ஆரம்பித்து விடும். கையிருப்பில் வாங்கி வைத்திருக்கலாம். இரண்டாம் வகை குழுமங்களை பொறுத்த வரை குழுமம் ஆரம்பிக்க போகும் காலத்திற்கு அருகில் வாங்கினால் லாபம் ஈட்டலாம். எப்படி இருப்பினும் முதல் இரண்டு காலாண்டுகளுக்காவது, நஷ்டத்தையே காட்டும். இதுபோன்றே, விமான போக்குவரத்து துறை (Aviation Transport) , எரிசக்தி (Power) துறை போன்ற துறைகளை சொல்லலாம். தகவல் தொழிட் நுட்பத் துறையை (IT)  பொறுத்த மட்டில், மனித வளத்தை (Human Resources)  நம்பியுள்ளதால், மிக குறுகிய காலங்களில் வருவாயை ஈட்ட தொடங்கிவிடும்.

     வளர்ந்த ஒரு குழுமத்தில் முதலீடு செய்வதை காட்டிலும், தற்போது ஆரம்பித்து விரைவில் வளர போகும் குழுமத்தில் முதலீடு செய்ய Fundamental Analysis உதவும். ஏனென்றால், அக்குழுமங்கள் உற்பத்தியை ஆரம்பிக்காதலால், காலாண்டு அறிக்கைகள் இருக்காது. மிகச் சரியான நேரத்தில், மிகச் சரியான விலையில் செய்யும் முதலீடே நல்ல லாபத்தை தரும். ஒவ்வொரு கரடிகள் சந்தையிலும் இதுபோன்ற குழுமங்களில் முதலீடு செய்து, சில வருடங்கள் வரை கையிருப்பில் வைத்திருந்தால் நல்ல இலாபம் பார்க்கலாம். வாரன் பபெட் (Warren Buffett)  இன் வழியும் இதுதான்.

June 21, 2008 at 5:42 pm 4 comments

#3 Fundamental Analysis – Business

     பங்கு சந்தையில் ஊடகங்களின் பங்கு முக்கியமானது என்று உங்களுக்கு நன்கு தெரியும். பெரும்பாலும் பங்கு சந்தையில் உள்ள Momentum பங்குகள் அனைத்தும் ஊடகங்களின் துணை கொண்டு தான் உருவாக்கப்படுகின்றன. Momentum பங்குகள் என்றால் ஊடகங்களில் ( பத்திரிக்கை, தொலைக்காட்சி மற்றும் நிபுணர்கள்) அனைத்தும் இப்பங்குகளை பற்றியே பேசி, எழுதி இப்பங்கின் விலையை    ஒரு குறிப்பிட்ட காலம் வரை ஏற்றி, இறக்கி விளையாடுவார்கள். Momentum பங்கின் விற்பனை மிகவும் அதிகமாக இருக்கும். குறிப்பிட்ட காலம் முடிந்தவுடன் வேறு பங்கிற்கு இந்த அந்தஸ்தை கொடுத்து விடுவார்கள்.

    உதாரணத்திற்கு, சென்ற வருடங்களில் கீழ்க்கண்ட பங்குகள் இந்த அந்தஸ்து  பெற்றிருந்தன என்பதை கவனித்திர்பீர்கள் ( இந்த பட்டியலில் ஏதேனும் பங்கு விட்டு போயிருந்தால் சொல்லலாம்)

1) ஜீ எம் ஆர் இன்ப்ரா (GMR Infrastructure)

2) எஸ்ஸார் ஆயில் (Essar Oil)

3) ரிலையன்ஸ் பெட்ரோலியம் (RPL)

4) யுனிடெக் (Unitech)

5) யுகோ வங்கி (Uco Bank)
6) ஐஸ்வர்யா டெலிகாம் (Aishwarya Telecom)

   இந்த வகை Momentum பங்குகள் அனைத்துமே முதலீட்டுக்கானவை அல்ல. அடிப்படை நன்றாக உள்ள சில பங்குகள் இருக்கலாம். ஆனாலும் முதலீடு செய்வதில்  மிகுந்த கவனம் வேண்டும். குறிப்பிட்ட காலம் முடிந்தபிறகு இந்த பங்கினை பற்றி ஊடகங்கள் கண்டு கொள்ளாமல் போய்விடும். முதலீடு செய்தவர்கள் உடனே தவறான பங்கில் முதலீடு செய்துவிட்டோம் என எண்ணி நஷ்டத்தினை உறுதி செய்து கொள்ள நேரலாம், அப்பங்கு அடிப்படையில் நல்ல பங்கு என்றாலும் கூட. இதனை தவிர்க்க இதில் முதலீடு செய்வதற்கு முன்னேயே அக்குழுமத்தை பற்றி மிகத் தெளிவாக அறிந்திருத்தல் வேண்டும். மேற்குறிப்பிட்ட பங்குகளில் ஐஸ்வர்யா டெலிகாம் பங்கின் ஆட்டத்தினை சமீபத்தில் பார்த்திருப்பீர்கள்.

     இந்த வகை பங்குகளை வாங்குவதை முதலீடு (Investment)  என்று தவறாக நிறைய பேர் எண்ணி கொண்டிருக்கிறோம். இதை வணிகம் (Trade)  என்றுதான் சொல்ல வேண்டும். வணிகம் (Trade) மற்றும் முதலீடு (Investment) போன்றவற்றிற்கு என்ன வித்தியாசம்? வணிகம் என்பது ஒரு பங்கினை வாங்கி மிகக் குறுகிய காலத்திற்குள் விற்று இலாபம் அல்லது நஷ்டத்தினை பார்ப்பது. இதைதான் Swing Trade என்பார்கள். காளைகளின் சந்தையின் மிகப் பெரிய Drawback என்னவென்றால் முதலீட்டாளரை (Investor)  வணிகராக( Trader) ஆக்கி விடும். முதலீடு என்றாலே குறைந்தது ஒரு வருட காலமாகவது  அப்பங்கினை கைவசம் வைத்திருக்க வேண்டும். நல்ல அடிப்படை பங்கின் மீது முதலீடு செய்தால் நஷ்டம் ஏற்படுவது என்பது மிக மிக அரிது.

      உங்களில் பலர் பல்வேறு தொழில்களை செய்து கொண்டிருக்கலாம். டாக்டர், ஆசிரியர், விவசாயி என்று. ஒரு பங்கின் அடிப்படை வணிகம் என்ன என்று அலசும்போது அது உங்களுக்கு மிகவும் பரிட்சயமான துறையாக இருந்தால் நல்லது. நீங்கள் மருத்துவராக இருப்பின்  பார்மா (Pharma)  துறை பங்குகளை தேர்ந்தெடுக்கலாம். அதுபோல், விவசாயிகள் உர நிறுவனங்கள் (Fertilisers) , சர்க்கரை துறை (Sugar ) பற்றி. நீங்கள் தேர்ந்தெடுக்கும் துறை உங்களுக்கு மிகவும் பிடித்தமானதாக இருந்தால் அத்துறை சார்ந்த பங்குகளை பற்றி செய்கையில் நமக்கும் இயல்பாக உற்சாகம் ஏற்படும் அல்லவா!  அத்துறையில் நீங்கள் பணியாற்றி கொண்டிருப்பதால், உங்களுக்கு அத்துறையின் விஷேச அம்சங்கள் (Special Factors) அனைத்தும் உங்களுக்கு அத்துபடியாக இருக்கும்.

      இதற்கு முன் தெரிவித்திருந்தபடி, அக்குழுமத்தின் முக்கிய வருவாய் ஆதாரமாக (Main Revenue Source) விளங்குவது எந்த வகை வணிகம் என்பதில் சந்தேகமே இருக்கக் கூடாது. சில குழுமங்கள் இதர வகையின் முலம் பெறபட்ட வருமானம் (Income from Other Operations)  என்று வருவாய் ஆதாரம் காட்டும். அவ்வகை ஆதாரங்கள் என்னென்ன என்பதை தெளிவாக கண்டறிய வேண்டும். அவ்வகை ஆதாரங்கள் குறித்த தகவல்கள் அக்குழுமத்தின் கணக்கு தணிக்கை அறிக்கையில் (Audited Report)  தெளிவாக குறிப்பிடப்பட்டிருக்கும். பட்டிருக்கப்பட வேண்டும். சில நேரங்களில் இந்த வகை ஆதாரங்கள் ஒரு குழுமத்தின் வருவாய் ஆதாரங்களை தவறாக புரிந்து கொள்ள வைத்து விடும்.

     ஒன்றுக்கு மேற்பட்ட வருவாய் ஆதாரங்களை ஒரு குழுமம் கொண்டிருந்தால், அதனுடைய வருவாய் ஆதாரங்களில் அடிப்படையானது எது என்று கண்டறிந்து, அக்குழுமம் தன்னுடைய முக்கிய வருவாய் ஆதாரங்களை மாற்றி கொள்ளும் வகையில் அக்குழுமத்தின் மேலாண்மை செயல்படுகிறதா என்பதையும் அலச வேண்டும்.  அவ்வாறு மாற்றினால் அது குறித்து ஏதேனும் ஆண்டறிக்கையில் (Annual Report)  கூறப்பட்டிருக்கிறதா என்று பார்க்க வேண்டும். மாற்றுவதற்கு உரிய காரணங்கள் உள்ளனவா என்றும் தெரிந்து கொள்ளுதல் நலம். அவ்வாறு மாற்றினால் அதனுடைய அடிப்படை வணிகம், போட்டியாளர்கள் போன்ற அனைத்தும் முற்றிலும் மாறிவிடும். மீண்டும் அப்பங்கினை analysis செய்து தான் முதலீட்டை தொடர்ந்து நீட்டிக்க வேண்டுமா என்பது பற்றி முடிவு செய்ய வேண்டும்.

      மேலே கூறப்பட்ட  அனைத்தும் ஒரு துறையை தேர்ந்தெடுத்து ஒரு பங்கினை Fundamental Analysis செய்வதற்கு முன் செய்ய வேண்டிய பணிகளாகும்.  இப்பயே கண்ணை கட்டுதே  என்று திகிலடைய  வேண்டாம். யோசித்து பாருங்கள். என்னாலும் ஒரு பங்கின் அடிப்படையை யார் ஆலோசனையுமின்றி அலசி, முதலீட்டுக்கு உரியது அல்லது இல்லை என்று தீர்மானிக்க முடியும் என்று சொல்வதில் எவ்வளவு மகிழ்ச்சியாக உள்ளது! ஒரு முறை கற்றுக் கொண்டால் பின்னர் மிக எளிதாக இந்த கலை கைவந்து விடும். மிகுந்த மகிழ்ச்சியுடன் இதில் ஈடுபடுதலே முக்கியம்.

அடுத்தது கணக்கு வழக்கு பற்றி சிறிது சிறிதாக பார்க்க ஆரம்பிக்கலாம்!

June 16, 2008 at 8:46 pm 4 comments

#2 Fundamental Analysis : Some Data

    Funadamental Analysis என்பது தொடர் செயல்.  ஒவ்வொரு குழுமத்தை ஒருமுறை மட்டுமே Analysis செய்து ஒரு முடிவுக்கு வந்து விட முடியாது. ஒரு குழுமத்தை பற்றி செய்ய நமக்கு கீழ்க்கண்ட தகவல்கள் தேவைப்படுகின்றன:

1) வணிகம் (Business)

2) அதனுடைய கணக்கு வழக்குகள் விவரம்
    

 1) லாப நஷ்ட கணக்குகள் ( Profit and Loss Accounts)
   

  2) Balance Sheet

3) போட்டியாளர்கள் விவரம் ( Competitors)

4) மேலாண்மை திறன் (Management Performance)

5) தலைமையதிகாரி திறன் (Chief Executive Officer’s Performance)

வணிகம் (Business)
     இக்குழுமத்தின் முக்கிய வணிகம் (Basic Revenue Source)  எது என்பதில் எந்தவித குழப்பமும் இருக்கக் கூடாது. ஒரு குழுமத்தின் முக்கிய வருவாய் ஆதாரம் எந்த வணிகத்தில் வருகின்றது என்பது முக்கியம். ஒரு குழுமம் ஆரம்பத்தில் ஒரு பொருள் விற்பனையை முக்கிய வருவாய் ஆதாரமாக கொண்டிருந்து, சில ஆண்டுகளுக்கு பிறகு வேறொரு பொருள் விற்பனையை முக்கிய வருவாய் ஆதாரமாக மாற்றினால் மீண்டும் அக்குழுமத்தை மீண்டும் Analysis செய்யப்பட வேண்டும். உதாரணத்திற்கு, ஐ.டி.சி (I.T.C) குழுமம் தன்னுடைய முக்கிய வருவாய் ஆதாரமாக சிகரெட் விற்பனையை கொண்டுள்ளது. ஆனால் தற்போது அக்குழுமம் தங்குமிடங்கள் (Hotels and Resorts) மற்றும் உணவு பொருட்கள் விற்பனையிலும் முக்கிய கவனம் செலுத்தியுள்ளது. ஆனால், இன்றும் அக்குழுமத்தின் முக்கிய வருவாய் ஆதாரம் சிகரெட் விற்பனை தான்.

2) கணக்கு வழக்குகள் விவரம் (Accounting Books)
     பங்கு சந்தையில் பட்டியலிடப்படும் அனைத்து குழுமங்களுமே தங்களின் கணக்கு புத்தக விவரங்களை அனைவருக்கும் காட்ட வேண்டும் என்பதும், தங்களின் கணக்கு புத்தகங்களை உரிய காலத்திற்குள் தணிக்கை (audit)  செய்து விட வேண்டும் என்பதும் கட்டாயம். சில குழுமங்கள் தங்கள் கணக்கு புத்தகங்களை சில வருடங்கள் வரை தணிக்கை செய்யாமல் வைத்திருக்கும். SEBI தற்போது இந்நிலையை மாற்றியுள்ளது. அனைத்து நிறுவனங்களுமே குறிப்பிட்ட காலத்திற்குள் கணக்கு தணிக்கை செய்யாவிட்டால் சந்தையிலிருந்து நீக்கப்படும் (delist)  என அறிவித்துள்ளது. இது பற்றி பின்னர் விளக்கமாக பார்க்கலாம்.

3) போட்டியாளர்கள் ( Competitors)

     ஒரு வணிகம் நன்றாக நடக்கிறதா, எதிர்காலங்களில் இன்னும் நன்றாக நடக்குமா என்பதை அவ்வணிகத்தை மேற்கொண்டுள்ள குழுமங்களின் செயல்பாடுகளை வைத்து தெரிந்து கொள்ளலாம். ஒரு குழுமத்தின் போட்டியாளர்களின் செயல்திறனை பற்றி ஆராயாமல் ஒரு குழுமத்தின் செயல்திறனை பற்றி அறிய முடியாது.

4) மேலாண்மை திறன் (Management Performance)

     ஒரு குழுமத்தின் மேலாண்மை திறன் அக்குழுமம் நெருக்கடியான நேரங்களில் எவ்வாறு செயல்பட்டிருக்கிறது என்று பார்த்தாலே தெரியும். அவ்வாறு செயல்படும் திறன் கொண்ட மேலாண்மை தான் ஒரு Blue Chip  தகுதி கொண்ட குழுமம். உதாரணத்திற்கு Infosys மற்றும் L & T யை சொல்லலாம். Infosys  அமெரிக்க செலாவணியை பெரும்பாலும் நம்பி வணிகம் (Software Export) செய்வது . ஆனால், அமெரிக்க பொருளாதாரம் தற்போது மந்தகதியில் (Recession)  இருந்தாலும் இக்குழுமம் தன்னுடைய BPO Unit முலம் பெரும்பாலான வணிகத்தை மாற்றியுள்ளது. டாலரின் மதிப்பு குறைந்த போதிலும் இக்குழுமம் அதனுடைய வணிகத்தை diversify செய்து சென்ற காலாண்டு (March 2008 )  நல்ல இலாபம் கொடுத்துள்ளது.

5) தலைமையதிகாரி திறன் ( Chief Executive Officer’s Performance)

     தலைமையதிகாரி என்பவர் ஒரு குழுமத்தின் பெயரை சொன்னவுடன் நினைவுக்கு வருபவர். அக்குழுமத்தின் வளர்ச்சியில் அவருக்கும் ஒரு பங்கு உண்டு. உதாரணத்திற்கு, ரிலையன்ஸ் (Reliance) என்றால் அம்பானி,  ஐடியா (Idea Cellular)  என்றால் பிர்லா. இதை ஏன் பார்க்க வேண்டும்? உதாரணத்திற்கு டாடா தொழிற்குழுமம் (Tata Group)  ( டாடா மோட்டார்ஸ், டாடா பவர் போன்ற குழுமங்களை உள்ளடக்கியது) தலைமை பதவியை வகிப்பவர் ரத்தன் டாடா. அவர் ஒரு பிரம்மச்சாரி. ஓய்வு பெறும் நோக்கமும் தனக்கு உள்ளது என்று ஒரு முறை சொல்லியிருக்கிறார். டாடா குடும்பத்திலிருந்து மற்றொரு தகுதியான நபர் வருவார் என்றாலும், இதுவரை யார் என்ற விவரம் தெரியவில்லை. இந்நிலையில் இத்தொழிற்குழுமங்களில் முதலீடு செய்யும் முதலீட்டாளர்களின் கவலை நியாயமனது தானே!

     இந்த தகவல்களை எவ்வாறு திரட்டுவது மற்றும் எவ்வாறு பயன்படுத்துவது என்பது பற்றியும் வரும் நாட்களில் பார்ப்போம்.

 

June 15, 2008 at 9:57 am 2 comments

Older Posts Newer Posts


கோப்ரா தீவில் கோயாவி – முக்கிய அறிவிப்பு

இந்த கதையானது பூமி மற்றும் பிற கிரகங்களில் இருக்கும் எந்த உயிரினங்களின் மனதையோ, உடலையோ புண்படுத்தும் வகையில் எழுதப்படவில்லை. அவ்வாறு இருந்தால் அது தற்செயலே. இந்த கதையில் நடைபெறும் சம்பவங்கள் அல்லது வசனங்கள் பூமியில் நடக்கும் வாழ்க்கையை பிரதிபலிப்பவை அல்ல. அவ்வாறு நடப்பது புளுட்டோவில் புண்ணாக்கு கிடைக்க என்ன சாத்தியக்கூறோ அந்தளவிற்கு சாத்தியம். எதுக்குடே இப்டி எழுதுறே என்ற வகை பின்னுட்டங்கள் பிரசுரிக்கப்படாது. கள்ள ஐடீ பின்னுட்டங்கள் ஊக்குவிக்கப்படும்.

twit…twit…twit

  • Saw Noah. Very droll. Crowe lifts up the film in few moments. But why it is made. Only Creator can answer that. 8 months ago
  • If my office is attacked by ninjas right now, I might get a day's off. 1 year ago
  • Whatever the case, China domintes the Medal tally. As an asian, I'm proud. Why don't give Olympic Training to Army rather than Politicians 2 years ago
  • Just saw KV Anand's Maatyran trailer. Something struck on me! 2 years ago
  • @karthi_1 நல்லவேளை "முத்தமிழ் அறிஞர்களின் வாழ்வில் நடந்த சுவையான நிகழ்ச்சிகள்" உங்களிடம் இல்லை. ;) 2 years ago

Recent Posts

December 2014
M T W T F S S
« Jul    
1234567
891011121314
15161718192021
22232425262728
293031  

Follow

Get every new post delivered to your Inbox.